Khliehriat, Jymmang 22
Ka MLA jong ka Sutnga Saipung, Kong Santa Mery Shylla ha ka Sngi Palei ka la plie paidbah ïa ka madan ïalehkai Futsal ha shnong Saipung, East Jaiñtia Hills District bad la bei tyngka da ka District Mineral Foundation (DMF) Fund.
Ha kane ka sngi la donlang ruh u Deputy Commissioner bad Chairman, DMF Trust, East Jaiñtia Hills District u Shivansh Awasthi (IAS), u MDC ka thaiñ Bah Lalwilliam Thiaite, Public Prosecutor, East Jaiñtia Hills u S. Pdang, Block Development Officer (BDO) Saipung u Dr. R. Pyrtuh, ki waheh shnong nalor kiwei kiwei ki ‘riew rangbah ka thaiñ.
Haba ai jingkren ha kane ka sngi ka Kong Santa Mary ka la pynpaw halor ki kam ka sorkar bad bor pynïaid District ha kaba kyntiew ïa ka jingïalehkai lyngba ki jingbei tyngka ban thaw ïa ki lad jingïalehkai bad kiwei kiwei ki lad bad ka la kyntu ban pyndonkam hok ym tang ïa kane ka madan ïalehkai Futsal hynrei ïa kiwei kiwei ki jingtei jong ka sorkar.
Ka la ban jur ruh halor ka jingdonkam ban shna shuh shuh ïa ki jaka ïalehkai hapoh ka distrik khnang ban pynshlur bad ïoh jingmyntoi ki samla don sap.
Haba kren halor katto-katne ki jingthmu pynroi ba la leh da ka Sorkar ha kylleng ki bynta bapher bapher kynthup ïa ka pule puthi, ka koit ka khiah, bad kiwei kiwei, ka Kong Shylla ka la pynbna ba ka projek ban pynbha ïa ka surok kaba pynïasoh ïa ka Sutnga bad Saipung ka la don lypa ha ka jingpynkhreh bad ka la pynpaw ka jingkyrmen ba ka jingtrei ïa kane ka bynta kan sdang ha kine ki saw ne san bnai ban wan.
La pynphuh-pynphieng ïa ka jingïalang da ki jingshad jingrwai na ki samla ka thaiñ Saipung.
