Jowai, Jymmang 22
Khnang ban kyntiew ïa ka kam khaïi-pateng hapdeng ki nongshong shnong ka Rilum Jaiñtia bad ki nongshong shnong ka Bangladesh, ka Synjuk Ki Waheh Shnong Ri Jaiñtia (SWSRJ) ki la dawa ban thaw noh ïa kawei ka Land Custom Station ne ka LCS ha East Jaiñtia Hills District bad kawei pat ha shnong Muktapur jong ka West Jaiñtia Hills District.
Ka Synjuk ka la pynpaw ïa kane ka jingdawa ha ka dorkhas ba la ai sha u Myntri Rangbah ka Jylla u Conrad K Sangma ha Orchid Inn Thadlaskeiñ ha ka 21 tarik u bnai Jymmang mynta u snem.
Ha katei ka dorkhas, ka Synjuk ka la ong ba ka Rilum Jaiñtia ka dei ka thaiñ kaba la shah kyrkhu kyrpang da U nongbuh nongthaw namar ka thaiñ ka don ki marpoh khyndew kum u dewïong, u mawshun bad u mawbah haba ka Sorkar Jylla ka la kamai shibun shah da kaba lum khajna na kitei marpohkhyndew kiba shalan sha Bangladesh lyngba ka Dawki -Tamabil.
Ka dorkhas ka la pynpaw ïa ka jingsngewdiaw halor ka jingslem jong ka thoh khana samari ne census namar ka jingktah jong ka khlam COVID bad katei ka jingslem ka la ktah kylla ïa kiba duk bad suk bad ka Synjuk ka la dawa ïa ka jingsdang noh mardor jong katei ka jingthoh khana samari.
Ka Synjuk ka la pynpaw ruh ka jingsngewkhia halor ka jingkyntait noh ïa ki jingshna ‘retaining wall’ bad ‘fencing’ hapoh ka skim MGNREGA bad ka jingkyntait ïa kitei jait jingshna ka ktah shibun namar ka thaiñ ka dei kaba don ki lum bad ki riat. Ka Synjuk ka dawa ïa ka jingpynrung biang jong kitei jingshna hapoh ka skim 100 sngi.
Ka Synjuk ka la ong ba ka jingslem pyllait ïa ki skim PMAY ka ktah shibun ïa ki nongïoh myntoi ne beneficiaries, kumta ka Synjuk ka la dawa ïa ka jingpynneh ïa ka dor jong ki mar ki mata ne ka schedule of rate kaba mynta.
Ka Synjuk ka la pynpaw ïa ka jingdonkam jong ki Special Rescue Team ha Rilum Jaiñtia ne ki kynhun treikam ba kyrpang kiba la pyntbit ha ka kam ïarap ïa ki briew kiba mynsaw ha ka jingjulor ka bor mariang.
U Myntri Rangbah u la kular ban khmih bniah halor kitei ki jingdawa jong ka Synjuk.
