Shillong, Jymmang 22
Kan long ka sien kaba nyngkong eh ba ka Shillong Sports Associa-tion (SSA) ka la rai ban pynlong ïa ka Champion-ship League cum Knock-out mynta u snem 2025 da ka jingthmu ban ailad ïa ki kynhun kiba rah nam lahduh na baroh ki kyrdan ïalehkai ba kin ïoh ban shim bynta lang ha kane ka lympung.
Kane ka la wan hadien ba katei ka synjuk ka la pynbna paidbah ha ka Sngi Palei ïa ka almanak ïaleh-kai na ka bynta ki lympung ïalehkai jong u snem 2025 kiba kynthup naduh ka Shillong Premier League, First, Second, Third bad ka Fourth Division.
Kat kum kane ka almanak kaba la pynbna hynne ka sngi, la ong ba yn sdang nyngkong eh da ka U-20 Fourth Division naduh ka 2 tarik u Jylliew ha kaba yn bud sa ka Third Division ha ka 16 tarik u Jylliew, ka Second Division ha ka 7 tarik Nai-tung bad ka First Division ha ka 15 tarik u Nailur.
Katei ka synjuk ka la pynbna ba kan pynlong noh kham kloi ïa ka Shil-long Premier League naduh ka 14 tarik u Naitung bad ka Championship League cum Knockout la thmu ban pynlong ha u Naiwieng mynta u snem.
Shuh shuh ka SSA kan pynlong ruh ïa kiwei ki lympung ïalehkai na ka bynta ki khynnah kum ka Under-16, Under-14, Under-12 bad ka Women’s Football League kiba la thmu ban sdang ha ka taïew u Nohprah 2025.
Haba pynpaw sha ki lad pathai khubor, u Working President ka SSA Bah Robert Dkhar u la pynpaw, “Ka jingpynlong shwa ïa ka Under-20 Fourth Division ka dei naduh u bnai Jylliew u dang biang bha na ka bynta ki samla pule ba kin ïoh ban shim bynta namar kam pat da ktah than ïa ki ha ki jingpule.”
“Ha ka Under-20 Fourth Division ki don 29 tylli ki kynhun hadien ba kawei kam shym la wan ïashim bynta. Te, kumta ïa kine yn phiah sha hynriew tylli ki group bad mar ar tylli ki kynhun ki ban wan ha ki kyrdan ba ha khlieh na manla kawei pa kawei ka group kin ïoh rung sha ka pre-quarter final,” la pynpaw u General Secretary Bah D. L Nongbri.
“Ha kaba ïadei bad ka SPL yn pynlong tang ha kawei ka wat jingïakhun (single leg), hynrei ki hynriew tylli ki kynhun kiba wan kham shakhmat (top 6) kin ïoh rung sha ka Super Cup na ka bynta ban ïaknieh pat ban ïoh rung sha ka semi final,” la ong u Football Secretary Bah Freddy Kharpran.
“Kane ka jingpynlong kloi ïa ka SPL mynta u snem ka long ban ailad ban pynkhreh ïa ka kynhun ïalehkai ka Jylla ka ban mihkhmat sha ka Santosh Trophy.”
“Kane ka jingpynlong ïa ka Championship Lea -gue ka long ban ailad ïa baroh ki kynhun ki ban khur nam lahduh ha baroh ki division ba kin ïoh ban shim bynta lang ha katei ka lympung khnang ba kin sngew-thuh ïa la ka jong ka jingkhlaiñ bad ha kano ka bynta kaba ki dang duna,” la ong u Bah Robert da kaba bynrap ba ha kaba ïadei bad ki lympung ïalehkai jong ki khynnah skul bad jong ki kynthei yn pynlong ha u Nohprah namar ka long kaba biang eh na ka bynta jong ki hadien ba ki la ïoh shuti tlang.
