Shillong, Jymmang 22
Ka Bulls Treks Wah-niangleng kaba don ha Khatar Mer, Mylliem, East Khasi hills District kaba la sdang paw ha ki kam jngohkai pyrthei namar ka jingjyrngam ki phlang ha madan bad don ki ksehbilat, ki trai kiba shim wai ki la hap khang shwa shipor namar ka jingïaknieh long trai ki trai jaka.
Ka jingsdang ban ym shah shuh ban rung ïa ki nongjngohkai pyrthei ha Wahniangleng ka la sdang naduh mynta ka taïew hadien ba ka ïingbishar ka la pynmih ïa ka hukum ban ym shah ban rung ïa ki nongtrei jong ka Green Warrior kaba shim wai ba kin leit sha kane ka jaka namar ki don ki ar mamla kiba ïaknieh ban long trai.
Haba ïoh ban ïakren bad u nongaibuit jong ka Green Warrior Bah Laning Bareh, u la ïathuh ba hadien ba la ïoh ka hukum na ka ïingbishar ban pynsangeh shipor ban pynïaid ïa kane ka jaka jngohkai, kumta ki la khang ban ym rung ki nongjngohkai khnang ban ym don kano-kano ka jingma ïa ki haba ki briew kiba nabar kin rung sha kane ka jaka.
U la pyntip ba ka jingkhang shipor ban rung ïa ki nongjngohkai pyrthei namar lada ym don ki nongtrei jong ka Green Warrior ban batai kan buh jingma ïa ki namar ha Wahniangleng ka don ka um kaba tuid.
U la ïathuh ba u la poi ban leit kai sha Wahniangleng ha u snem 2022 ha kaba u la lap ïa ki bilor, ki bilor kyiad bad don tang ki nongkhwai hynrei ynda u la wad ïa ki trai u la ïoh ban pynitynnad hadien ba u la shim wai ban pynïaid.
“Nga la aiti ha ka Green Warrior kaba dei ka kynhun jong ki kynthei jong ka shnong Khatar Mer ha kaba 50 percent na ka jingïoh kamai la pynlut ban siew bai nongtrei bad pynbha ïa katei ka jaka bad 50 percent ban phah skul ïa ki longïing baduk, ban noh synñiang ïa kiba duk” u la ong.
U la ïathuh ba hadien ba la wan lum khubor U Nongsaiñ Hima ha kine ki sngi, ki paidbah ki la sdang ban tuid biang sha Wahniangleng hynrei u la kyrpad ïa ki paidbah ban ïaishah namar kin sa plie biang ynda la dep ïapynbeit.
Kum ban shu pynkynmaw, haba U Nongsaiñ Hima u la leit ban lum khubor ïa ka Wahniangleng ka la pynlong ïa ki paidbah kiba ïohi ban ai jingïaroh namar ka jingitynnad ka jaka namar ki nongjngohkai ki pynpaw ba ka long thik kum ka “Mini Switzerland” bad don ruh kiba ong ba ka la ïasyriem bad ka Pahalgam, Kashmir kaba dang shu shah thombor ki nongjngohkai ha ki lehnoh dang ha kine khyndiat taïew ba la leit.
Ban poi sha Wahniangleng hap ïaid na Mylliem ka lad na kamon lada wan na Shillong, tangba hap ïaid sa da ka kjat kumba 30 minit na jaka ïeng kali shaduh Wahniangleng.
