Shillong, Jymmang 22
Ka Hynñiewtrep Youth Development Council (HYDC) East Jaiñtia Hills District ka la bteng ïa ka jingïakhun ba jur halor ka hok jong ki nongtrei bylla sngi da ka jingpyntreikam hok ïa ka aiñ Minimum Wage ba la pyntreikam da ka Sorkar Meghalaya. Kane ka long ka bynta kaba lai jong ka jingpyntreikam ka seng halor ka aiñ, hadien ba ka bynta kaba nyngkong bad ka bynta kaba ar la dep pynlong ha East Khasi Hills District.
Ka HYDC East Jaiñtia Hills kaba la ïalam da u Working President, Bah Mihsalan Thoo, ryngkat u General Secretary Bah Hepwing Chyrmang, bad kiwei ki dkhot, ka la leit tur sha ki jaka trei kam kum ki jaka die bam, ki petrol pump bad ki karkhana ha thaiñ Ladrymbai ban jurip bad ban pynbor ïa ki trai kam ba kin bud hok ïa ka aiñ minimum wage.
Ha kane ka jingleit khynra jong ka seng, la lap shai ba bun na ki trai kam kim shym la bud satia ïa ki kyndon ba la buh da ka Sorkar, bad ki dang ai tang T.200 eiei shi sngi kum ka bai bylla, kaba long ka jingshah ïuhroit kaba jur ïa ki nongtrei ha ki jaka kiba la dei ban ai bai bylla katkum ka aiñ.
Katkum ka kyndon jong ka aiñ minimum wage ba la pynmih da ka Sorkar Meghalaya ka long, na ka bynta ki Unskilled ka dei T.525 shisngi, T.13,650 shi bnai. Ïa ki Semi-skilled, T.565 shisngi bad T.14,690 shi bnai. Na ka bynta ki Skilled, T.605 shisngi bad T.15,730 shi bnai bad ïa ki Highly Skilled pat T.645 shisngi bad T.16,770 shi bnai.
Ka HYDC ka la pynpaw ïa ka jingsngew lyngngoh bad ban shah ba ka Sorkar hi ka bym lah ban pyntreikam ïa ka aiñ kaba ka la thaw hi da lade. Ka seng ka la buh ruh ïa ka jingkylli kaba khlaiñ, hato kane ka aiñ ka dei tang ka kot ban buh ha file ne ka dei ban shakri hok ïa ki nongtrei ba duk bad ba lanot?
Ka seng ka la kynnoh ruh ba ka jingbym shimkhia jong ka Sorkar Meghalaya ka pyni ba ka la klet noh ïa ki paidbah riewlum jong ka jylla, khamtam ha East Jaiñtia Hills, kiba kham duna ha ka ïoh ka kot bad kiba trei ha ki kam bylla sngi.
Ka seng ka la rai ruh ban nang ïai buddien bad ban khlieh ha ka jingïakhun na ka bynta ka hok bad ka bha ka miat jong ki nongbylla, bad ban pynshai ba ka minimum wage dei ban pyntreikam khlem da shah ieh sha ka jingkwah jong ki trai kam.
Ka HYDC ka la ong ba kan ym shongkli kti, hynrei kan ïai trei borbah ban pyntreikam pura ïa ka aiñ, khnang ba ka ïoh ka kot jong ki riewlum, khamtam ki trai ri kin nang kiew bad roi stet ha ka bri u hynñiewtrep.
