Nongstoiñ, Jymmang 22
Ha ka 22 tarik mynta u bnai, ka skul Rongrin RMSA Higher Secondary, ka la ïoh ban plie paidbah noh ïa ka ïing skul lane ka building kaba thymmai ka jong ka, ha kaba u MLA ka Mawshynrut u Bah Methodius Dkhar u la long kum kongsan ha ka jingdonlang u MDC ka thaiñ Bah Sraly Rashir.
Ïa katei ka ïing ba thymmai jong ka skul Rongrin RMSA la tei bad shna lyngba ka SEMAM/SAMAGRA SA jong u snem 2022-23 ha ka mang pisa kaba T.1,31,80,000/-.
U Bah Methodius Dkhar haba kren kum u kongsan u la pynpaw ka jingsngewkmen ban ïoh plie ïa katei ka ïing skul kaba thymmai, kaba la ïoh ïa ka mang pisa ha kaba u la ong ba ka jinglah bad ka jingïoh ïa katei ka ïing skul ka dei hi ka jingïatreilang bad ka jingïatrei ryngkat.
U kongsan u la pynpaw ruh ïa ka jingkhublei ïa ki nongpynïaid jong ka skul kaba ki la leit ban tur bad ïakynduh ïa ki tnat ba dei peit na ka bynta ban ïoh ïa katei ka mang pisa.
Ha kajuh ka por u Bah Methodius u la ai khublei ruh ïa u Myntri ba dei peit bad ïa baroh ki nongtrei jong ka tnat pule puthi, kiba la sngap bad sngew ïa ka jingkyrpad jong ki nongpynïaid jong ka skul bad kumjuh ruh ïa ka jingkyrpad jong u kum u nongmihkhmat ka dong ka thaiñ.
U Bah Methodius u la ïathuh ruh ba nalor ka jingïoh ïa katei ka ïing skul kaba thymmai jong ka Higher Secondary, mynta ka don pat sa ka jingtyrwa ba yn ïoh sa ïa ka ïing skul kaba thymmai jong ka UP School bad u la ong ruh ba ha ka jingïakren ka jong u, ba ka ‘sanction’ ka la don hakhmat bha bad lehse hapoh jong une u snem kin sa pyllait bad ai noh ïa ka work order.
U la pynpaw ruh da kaba ong ba “Kum u nongmihkhmat jong ka Mawshynrut nga pynleit jingmut bha ïa ki lai tylli ki sector, bad nga sngewthuh biang biang ba kum ka konstitwensi Mawshynrut, ngi don hapdeng ka jingeh na ka daw ba ka duna ïa kine ki sector.”
U la ong ruh kawei ka sector kaba ma u, u shimkhia bha ka dei ka pule puthi, kata ban pynbiang ïa ki ïingskul nangta ban ïoh shuh shuh ïa ki nonghikai ha ki skul bapher bapher na ka bynta ban nang kyntiew ïa ka konstitwensi namar kumba tip ba ka skul ka dei ka ïing kaba ar jong ki khun ki kti bad ki nonghikai ki dei ki kmie ki kpa kiba ar jong ki bad ka don ka jingngeit lada ki bit ki biang ki skul yn ïoh ïa ka long pateng kaba kham bit kaba kham biang.
Nangta, u la ong ruh ba sa kawei pat ka bynta kaba ma u, u shimkhia bha ka dei ka koit ka khiah, ki jaka sumar kiba pher bapher hapoh ka dong bad ka thaiñ bad sa kawei pat ka sector ka dei ki lynti ki syngkien, na ka bynta ban ïoh ïa ki surok ha ki shnong ki thaw.
U la ong ruh ba kine ki dei ki jingangnud jong ki paidbah bad ki dei ruh ki jingangnud ki jong u hynrei ban pynurlong ïa kine kiei-kiei baroh ka donkam ka jingïatreilang bad ka jingïasnohktilang.
Ha kane ka sngi plie ïa kane ka ïing skul kaba thymmai, la donlang ruh ka Kong D Hoojon, DSEO Nongstoiñ, u Rev Fr. Sylvester Nongsiej, Parish Priest Divine Mercy Umdang Parish, ki sister, ki nonghikai ka skul, u Babu Alexander Rongrin, Headmaster UP section, ki dkhot na ka kur Rongrin bad kiwei kiwei.
Shuh shuh ha katei ka sngi, la pynshit pynshngaiñ ruh da ki jingrwai, ki jingshad bapher bapher na ki khynnah jong katei ka skul.
