Shillong, Jymmang 22
Ka North Eastern Hill University Students’ Union (NEHUSU) ka la pynpaw ïa ka jingkyrmen kaba khraw ba ka Tnat Pule Puthi jong ka Sorkar Pdeng kan shim noh ïa ki sienjam kiba shisha, kiba lah ban pdiang da baroh ki tnat treikam ha ka skulbah NEHU, ban pynkut noh ïa ka kynrum-kynram kaba la sah slem bad pynkhih ruh ïa ka pule puthi ha ka skulbah.
Kane ka jingpynpaw ka la mih hadien ka jingïakynduh jong ki nongmihkhmat ka NEHUSU bad ar ngut ki heh jong ka tnat ba dei khmih ïa ka pule puthi jong ka Sorkar Pdeng, u Additional Secretary, Sunil Kumar Barnwal bad u Director, Subrat Kumar Pradhan, kiba la wan jngoh kyrpang ïa ka NEHU ban bishar bniah halor ka jinglong jingman kaba mynta.
U Vice President ka NEHUSU, u Rikideiburom Bamon, haba kren bad ki lad pathai khubor hadien ka jingïalang, u la pynpaw ba ka jingïakren ka long kaba seisoh bad kaba don ka jingmut kaba khraw. U la ïaroh ïa ka Tnat Pule Puthi kaba la shimkhia bad la phah ïa ki heh ophisar jong ka ban ïohsngew ïa ka jingud jingnam jong ki samla pule bad kiwei ki bynta hapoh ka NEHU.
“Ka jingïalang ka la long kaba ïoh ïa ka jingsngap kaba pura. Ki heh Sorkar ki la ai ka jingïaroh ïa ka jingpynsngew jong ngi bad ki la pynpaw ruh ba ka jingpynbeit ka dei ban long kaba lah ban pdiang da baroh ki bynta treikam jong ka skulbah,” la ong u Bamon.
U Vice President u la ïathuh ba na ka liang jong ki, ki la ai ruh katto katne ki jingmut ba la bishar bniah bad kiba la buh kyrpang ban ïarap ban wanrah biang ïa ka jingshong suk bad ka jingïaid beit ka pule puthi hapoh ka skulbah.
“Ka NEHUSU ka kwah ban ïohi ïa ka jingwanphai jong ka jingshong suk bad ka jingsynshar hok ha NEHU. Ngi la pynpaw shai sha ki heh Sorkar ba kane ka jingeh ka dei ban pynkut noh shen namar ba ka la ktah jur ïa ki samla pule,” la bynrap u Bamon.
U Vice President ka NEHUSU u la pynpaw da kaba shai ba ka Union kan ym ailad satia ba u VC, u Prof. P Shukla un wanphai biang sha kane ka skulbah.
“Ka NEHUSU ka la don ka rai kaba skhem. Ngi kyrmen ba ka Sorkar Pdeng ruh kan shimkhia ïa kane. Ngi la bthah shai ba u Prof. Shukla um dei shuh ban bteng ha ka shuki Vice Chancellor namar ba ka jinglong treikam jong u, ka la wanrah ïa ka jingsngew pyrshah na baroh ki liang, naduh ki samla pule haduh ki nonghikai,” la ong u Bamon.
U la pynkynmaw ruh ba wat ki sengbhalang bad ki trai ri trai muluk jong ka Jylla Meghalaya ki la pynbna paidbah ïa u Prof. Shukla kum u ‘Persona Non-Grata’; kaba mut ba u long uba laitluid ban ym wan rung shuh sha ka jylla, namar ba u la leh pyrshah ïa ki jinglong jingman bad ka jingngeit jong ki paidbah riewlum.
Lah ban kdew ba ka kynrum-kynram hapoh ka NEHU ka la neh la slem bad ka la ktah jur ïa ka rukom pule, ka jingpyllait result, ka jingthungkam, bad ka jingshong suk hapoh ka jaka pule. Ka jingpynbna jong ka NEHUSU mynta ka sngi ka long ka dak ba shai ba ka jingïakhun ban kyntiew ïa ka NEHU ka dang ïaid bad kan ïai bteng haduh ba ki jingpynbeit kin long kiba paw shabar.
