Shillong, Jymmang 22
Ka Sorkar Assam ka la phai khmat sha ka komiti ka Supreme Court ha kaba ïadei bad ka jingtih bad ot ïa ki lum ha Meghalaya, la pyntip u Myntri Rangbah ka Jylla Assam u Himanta Biswa Sarma bad la kynnoh ruh ba kane ka jingleh ka la wanrah ka jingdap bad shlei um ha Guwahati.
Haba kren sha ki lad pathai khubor ha Dergaon ha Golaghat district, u la ong ba lada ka jingtih ne pynmadan ïa ki lum ka dang ïai bteng ha Meghalaya, ka Guwahati kan sa kylla long kum ka duriaw.
“La ka dei ha Guwahati lane ha kiwei ki nongbah kiba heh, kan ym don satia ban lah ban khang ïa ka jingshlei um kaba pura. Manla u snem, ngi pyndap ïa ki jaka ba thylli bad tei ïa ki building,” u la ong.
Haba kynnoh ïa ka jingpynngat ïa u lum ha Meghalaya na ka bynta ka jingshlei um ha Guwahati, u la ong, “Kham mynshwa, dei tang ka jingleh ka USTM. Dang shen, nga la ïohi sa ar tylli ki ïing paki kiba dang tei da kaba pynmadan ïa u lum ha Meghalaya.”
Dang ha u snem ba la lah, u Myntri Rangbah u la ong ba ka daw jong ka jingdap bad shlei um jong ka Guwahati ka dei na ka jingleh jong ka University of Science and Technology, Meghalaya (USTM), da kaba kam ba ka um kaba tuid sharum na ka campus, kaba don halor u lum marjan bad ka nongbah Guwahati, ka la wanrah ka jingshlei um kaba jur bha.
U Sarma u la ong ba la dep ban aiti ïa ka aplikeshon da ka Sorkar Jylla hakhmat ka ’empowered committee’ jong ka ïingbishar Supreme Court, da kaba kyntu ban jurip ïa ki lum.
“Ha ki ar ne lai bnai, ngi khmih lynti ban ïohi ïa ka jingmih kaba biang. Ngi la dep ban aiti sha ka empowered committee ba lada ka Meghalaya ka dang bteng ban ot ïa u lum kumne, ka nongbah Guwahati baroh kawei kan sa kylla kum ka duriaw,” u la bynrap.
