Shillong, Jymmang 22
Ki trai dukan kiba shong die jingdie ha jaka ïeng kali ha Khatar Mer, Mylliem ki la pynpaw ka jingduhnong kaba khraw naba la khang noh ïa ka jaka jngohkai pyrthei ka Bulls Trek Wahniangleng namar ki la shaniah ban kamai jakpoh na kane ka kam.
Ka jingkhang ïa ka Wahniangleng ka dei namar ka don ka jingïakam trai jong ki trai jaka, kumta ki trai kiba shim wai kim kwah ba ki nongjngohkai kin leit sha ka wah khnang ban ym don ka jingmynsaw haba ym don ba peit ba jngoh ïa ki.
Haba u nonglum khubor u la poi sha jaka ïeng kali ha Khatar Mer la ïohi ba ka la kynjah namar ki dukan ki la khang namar bym don kali shuh kiba ïeng.
Haba ïakren bad katto-katne ki trai dukan ki la ïathuh ba ïa ka Wahniangleng la wah jingpynbna naduh ka miet Sngi Thohdieng, kumta kiba shong dukan ruh ki hap ban khang noh namar bym don ba wan kai shuh.
Ki la ïathuh ba ki la shna ïa ki dukan ba kin ïoh kamai jakpoh da ka jingwan ki nongjngohkai pyrthei hynrei lada khang noh kumne ka buh jingeh ïa ki nongshong shnong kiba la dep pynlut.
Kawei ka longkmie ka la ïathuh ba ka khlem leit bylla shuh namar ka la sngew im jakpoh da kaba shong dukan bad buh jaka ïeng kali hynrei mynta kan buh jingeh lada khang noh ïa kane ka wah.
Ka la ïathuh ba ki don ki nongjngohkai pyrthei ki la wan poi sha kane ka jaka hynrei ki la hap ban leit phai noh.
Shuh shuh, ka la pynpaw ba kane ka aïom ka dei kaba ki nongjngohkai pyrthei ki bun bha ban wan kai.
Kumta, kine ki nongshong die dukan ki kyrpad ïa kiba pynïaid ba kin shah noh ïa ki nongjngohkai ba kin leit sha Wahniangleng khnang ba kin ïoh ban kamai jakpoh biang.
Kum ban shu pynkynmaw ha kine ki sngi haba U Nongsaiñ Hima u la leit ban lum khubor ïa ka Wahniangleng, ka la pynlong ïa ki paidbah kiba ïohi ban ai jingïaroh namar ka jingitynnad ka jaka namar ki nongjngohkai ki pynpaw ba ka long thik kum ka “Mini Switzerland” bad don ruh kiba ong ba ka la ïasyriem bad ka Pahalgam, Kashmir kaba dang shu shah thombor ki nongjngohkai ha ki lehnoh dang ha kine khyndiat taïew ba la leit.
Ban poi sha Wahniangleng hap ïaid na Mylliem ka lad na kamon lada wan na Shillong, tangba hap ïaid sa da ka kjat kumba 30 minit na jaka ïeng kali ban poi shaduh kane jaka.
