Shillong, Jymmang 22
Ka Dorbar Shnong Nongspung, Nongspung Syiemship ha ka jingsynranlang da u MLA ka Mawphlang, Bah Matthew Beyondstar Kurbah ha ka 21 tarik u Jymmang, 2025 ki la leit ban ïakynduh ïa u Myntri ba dei khmih ïa ka tnat ki kam jngohkai ka Jylla, Bah Paul Lyngdoh ban kyrpad ha ka ban ïarap ban bei pisa na ka bynta ban pynneh-pynsah bad ban pynitynnad ïa ka shnong Mawsangri.
Haba kren sha ki lad pathai khubor, u Bah Kyntiewborlang Syiemlieh uba dei u Acting Syiem Hima Nongspung, u la ong ba katei ka jaka ha ka shnong Mawsangri ka long ka jaka kaba itynnad bha kaba dap da ki khanatang jong ka thaiñ bad ki jingitynnad jong ka mariang.
U la ïathuh ba katkum ka khana pateng jong ki nongshong shnong, la ngeit ba ka shnong Mawsangri ka dei ka kmie jong u Kyllang bad u Symper kiba dei ki arngut ki ‘riew pawnam ha ka pateng tynrai jong u khun Khasi-Khara.
U la ïathuh ba ïa kane ka khanatang la pynsah lyngba ki pateng, da kaba ngeit skhem ba lyngba ka jingpynneh-pynsah bad pynroi ïa kane ka jingmut jong ka kolshor, ka lah ban khring ïa ki nongjngohkai pyrthei bad ai jingmyntoi ïa ki nongshong shnong ha ka ïohkam-ïohjam.
U la ong ba lyngba ka jingpynroi bad pynneh pynsah kaba biang, ka Mawsangri ka lah ban long ka jaka jngohkai kaba pawnam bad ka jingkyntiew ïa ki jingmyntoi ha ka kolshor bad ka ïoh ka kot na ka bynta ka imlang-sahlang ha ka thaiñ.
“Ka jingkyrpad jong ngi na u Myntri ka long ba un ïarap lem ïa ngi haba ïadei bad ka pisa-ka tyngka ban khring ïa ki nongwan jngohkai pyrthei bad khnang ba kan wanrah ïa ka lad ïohkam-ïohjam ïa ki nongshong shnong ka thaiñ jong ngi”, ong u Acting Syiem ka Hima Nongspung.
Na ka liang u MLA ka Mawphlang u la ong ba da ka jingwan ban ïuhkjat dalade ha katei ka jaka, u la lap ba ka long shisha ka jaka kaba itynnad bha haduh katta-katta kaba pynïapmat ban peit.
U MLA u la ong na ka liang jong u bad ka Dorbar Shnong kin sa pynkhreh da ka kaiphod projek ka ban batai bniah haba ïadei bad ka jinglut jingsep ban shna bad pynitynnad ïa katei ka jaka kaba kynthup ïa ka jingshna surok sha jrong lum ban pynsuk ïa ka jingleit-jingwan ki nongjngohkai pyrthei bad ki nongshong shnong ruh kumjuh, ban pynitynnad ïa ki lynti ïaid bad ki jaka peitkai, ban shna ïa ka pung halor u lum ban pynitynnad ïa ka jaka ba kan long ka jaka shondur kaba itynnad bad ka jingshna ïa ka jaka peitkai ban ïohi sha ki thaiñ Mawkyrwat bad ki thaiñ Mairang, ka jingkyrshan na ka bynta ka jingpynitynnad ïa ka jaka daka thung jingthung bad kiwei-kiwei ki jingthmu ban pynitynnad.
