Shillong, Jymmang 22
Ka jingïakren halor ka jingpynbeit ïa ka kynrum-kynram kaba la saphriang hapoh ka North Eastern Hill University (NEHU) ka la nang ïaid shaphrang hadien ka jingïalang kaba la long ha ka Sngi Palei hapdeng ki nongmihkhmat jong ka NEHU Teachers’ Association (NEHUTA) bad ar ngut ki heh jong ka Tnat Pule Puthi ka Sorkar Pdeng.
U President ka NEHUTA, Prof. Lakhon Kma, haba ïakren bad ki lad pathai khubor, u la pynpaw ba ka jingïalang ka long kaba don ka jingïasngewthuh jingmut bad kumba ka paw, ka don ka jingthmu kaba shisha na ka liang ka Sorkar Pdeng ban pynbeit ïa ki jingeh kiba la neh slem hapoh ka skulbah NEHU.
U Prof. Kma u la ong ruh ba ka jingïakren ka la long ha ryngkat u Additional Secretary ka Ministry of Education, u Sunil Kumar Barnwal bad u Director, Subrat Kumar Pradhan, kiba la wan shane ban bishar bniah ïa ka jingtreikam jong ka skulbah, bad khamtam eh ïa ka rukom synshar kaba la wanrah ïa ka jingsngew bitar bad jingpyrshah jong ki nonghikai hapoh ka NEHU.
“Ka jingïalang ka long kaba don ka jingkren kaba la ïoh ban pyni ïa ki mat kiba kham ktah ïa ka pule puthi hapoh NEHU bad ruh ka rukom treikam jong u Vice Chancellor, u Prof. Prabha Shankar Shukla. Ngi la ai ïa ka rai jong ngi kaba shai: U VC um lah shuh ban bteng ban shakri ha kane ka skulbah,” ong u Prof. Kma.
U President ka NEHUTA u la ïathuh ruh ba na ka liang ki heh Sorkar Pdeng, ki la pyntip ba ki dang bishar bniah ïa ka kaiphod bad kaei kaba la mih na ka jingtohkit kaba ki la leh halor ka rukom synshar jong u VC. “Kumba ka paw, ki la dep shim ïa ka rai hynrei ki dang ap ban pyndep da ki sienjam ba dei ban bud,” la ong u Prof. Kma.
Shuh shuh, u la pynpaw ba katba ki kam ki dang ïaid, ka NEHUTA kan dang ïai buddien bad peitngor bha ban ïohi ba ka jingpynbeit kaba biang kan wanrah ïa ka suk ka saiñ bad ka jingshong suk ki samla pule bad ki nonghikai hapoh ka skulbah.
“Kum ka NEHUTA, ngi don ka jingkyrmen ba kane ka jingpynbeit kan ym long tang ka jingkren hynrei kan mih shisha da ki jingtreikam ba lah ban wanrah biang ïa ka jingshong suk bad ka jingïaid beit ka pule puthi hapoh NEHU. Ka skulbah ka donkam ïa ka jingpynkylla kaba paka khnang ban ym shah ktah ki samla pule,” la ong shuh u President ka seng.
Ka jingwan jngoh jong u Additional Secretary bad Director jong ka tnat pule puthi ha ka Sorkar Pdeng, ka la wanrah ka jingkyrmen ba ki jingeh ba slem kin sa pynbeit noh bad ban wanrah ïa ka rukom synshar kaba khuid kaba pynïaid beit ïa kane ka skulbah ba la rim ha ka thaiñ Shatei Lam-mihngi.
“Ka NEHU ka long ka rynsan kaba kongsan ban kyntiew ïa ka pule puthi ha ka thaiñ. Ngi don ka jingkyrmen ba kane ka sienjam na ka Sorkar Pdeng kan wanrah ïa ka jingïakren kaba seisoh bad ka jingïohi ka rukom treikam kaba khuid ha ki sngi ki ban sa wan,” la ong u Prof. Kma.
