Washington, Jymmang:
Katkum ki khubor, la ong ba ha kane ka sien, u Myntri ka tnat iada ri ka US, u Pete Hegseth, u la pdiang ia ka liengsuiñ Boeing-747 kaba la ai sngewbha na Qatar na ka bynta u President Donald Trump ban pyndonkam kum ka Air Force One.
U Sean Parnell, uba long u nongai ktien jong ka Pentagon u la ong ba ka tnat iada ri kan pyntikna ia ki lad jingiada kiba biang halor katei ka liengsuin ban pynlong ia ka, kaba shngaiñ ban pyndonkam da u President jong ka ri.
U Trump, u la ong ba katei ka jingai sngewbha, kaba u la ioh pdiang ha ka jingleit jurip jong u ba dang shen sha Middle East kum ka lad ban pynduna khajna. Naba u la ong ruh “Balei ki shipai jong ngi bad ki nongsiew khajna jong ngi, kin shah pynbor ban siew da ki spah million Dollar haba ki lah ban ïoh khlem jingsiew khlem jingsiew”.
Hynrei kiwei pat ki la pynpaw ia ka jingsngewkhia ba katei ka liengsuiñ ka dei ka jingpynkheiñ ia ka riti synshar ka ri kaba khang ia ki jing-ai sngewbha nabar ri. Ki la kdew ruh ia ka jingdonkam ban pynthymmai ia ka liengsuiñ ban pynbiang ia ki jingdonkam ha ka liang ka jingpahara, kaba yn hap ban pynlut kham bun ka pisa bad ka ban kham shim por ruh.
