Shillong, Jymmang 22
U coach ka kynhun ïalehkai U-23 jong ka ri India u Naushad Moosa ha ka Sngi Palei u la pynbna ïa ki 29 ngut ki rangïalehkai na ka bynta ban pynkhreh ïa ki jingïalehkai paralok ka ban long ha u bnai Jylliew ha Dushanbe, Tajikistan.
Te, ka India kan ïakhun pyrshah ïa ka kynhun ïalehkai U-23 ka Tajikistan bad ka Kyrgyz Republic (U-23) ki ban long ha ka 18 bad 21 tarik u Jylliew. Kane ka kynhun kan sdang ïa ka prokram kilanmet ha Kolkata ha ka 1 tarik u Jylliew bad kane ka jingkilanmet kan kut tad haduh ba kin da mih ban leit sha Dushanbe.
Kum shi bynta jong ki jingthmu na ka bynta ka kynhun ïalehkai U-23 jong ka ri India, ka AIFF ka la pynkhreh ïa ki prokram kilanmet bad ki jingïalehkai paralok na ka bynta ka India kiba long kat kum ki kyndon jong ka FIFA ban pynkhreh ïa ka AFC U23 Asian Cup Qualifiers, ka ban long ha kaba kut jong une u snem, bad ka Asian Games, ka ban long ha Japan ha u snem 2026.
