Jowai, Jymmang 22
Ka tnat Social Welfare ryngkat ka jingïatreilang bad ka District Hub for Empowerment of Women bad ka Jowai Women Police Station, West Jaiñtia Hills District ha ka 21 tarik Jymmang ki la pynkup burom ïa ka samla Sawakani Lakiang halor ka jingwanrah burom ïa ka jylla bad ka district da kaba khur ïa ka takma ksiar ha ka SAARC Women’s Bikini Model category, ka World Fitness Federation ba la pynlong da ka South Asian Association for Regional Cooperation ha Mumbai ha ka 19 tarik Jymmang.
Ka samla Sawakani Lakiang na Tpeppale, Jowai ka dei ka nongrah ktien jong ka Beti Bachao Beti Padhao, District Hub for Empowerment of Women, West Jaiñtia Hills District.
Ïa ka jingïalang pynkup burom la pynlong ha ophis jong ka DSWO kaba don ha Mookyrdup, Jowai.
Ha kane ka sngi la synran lang ïa ka samla Sawakani Lakiang da u coach jong ka, Dr. Desire Kynjin bad ki bahaïing bahasem.
Ka ophisar In-charge Women Police, Inspector ka Kong I Kharpran, District Mission Coordinator FG Rynnga, DHEW, ki nongtrei ka DSWO bad DHEW ruh ki la ïadonlang.
