Shillong, Jymmang 22
Ka East Khasi Hills District ka la rah ïa ka nam lahduh ha ka State Level Inter School Athletic Meet 2025 kaba la poi sha kaba kut ha ka Sngi Palei ha SAI Training Centre, hadien ba ka la lah ban khur 42 tylli ki takma kiba kynthup ïa 23 tylli takma ksiar, 11 tylli takma rupa lem bad 8 tylli takma rnong.
Kumba ka paw ha kane ka lympung ïalehkai kaba la neh lai sngi kynthih ha SAI Training Centre Shillong, ki khynnah ka EKH ki la lah ban pynpaw ïa ka jingtbit da kaba ki la lah ban tam bun shah na baroh ki district kiba la wan shim bynta.
Ka EKH ka don hok ban khur bun tylli ki takma namar ki khynnah ki la ïoh ban kilanmet lypa ha katei ka madan ba paka kaba don ha SAI. Nalor kata kiba bun na ki khynnah ki dei kiba la shah hikai ha SAI Training Centre bad katto-katne ngut ki don ha ka Super Elite programme.
Ka East Khasi Hills ka la ïoh ïa ka khusnam Best Team ha ka kyrdan jong ki khynnah shynrang da kaba khur 10 tylli ki takma ksiar, katba ha ka liang ki kynthei la ïoh da ka EKH kaba khur 13 tylli ki takma ksiar. Katba ka kyrdan ba-ar ha ka liang ki shynrang la ïoh da ka East Jaiñtia Hills kaba la khur 5 tylli ki takma ksiar, ha ka liang jong ki kynthei ka North Garo Hills ka la khur 3 tylli ki takma ksiar.
Shuh shuh, ka East Khasi Hills ka la ïoh ruh ïa ka nam Best Athlete ha ka kyrdan Under-16 bad Under-18 jong ki shynrang. Katba ïa ka nam Best Athlete na ka bynta ki shynrang bad kynthei ha ka Under-14 category la ïoh da u Rikangku D Sangma na South Garo Hills bad ka Akangesa A. Sangma na West Garo Hills.
Ha ka Under-16 la ïoh da u Saidul Ali na EKH ïa ka nam Best Athlete ha ka liang ki shynrang bad ka Rukini R.T Dkhar ha ka liang ki kynthei. Katba ha ka Under-18, ïa ka nam Best Athlete la ïoh da u Henry Yoga Sangma bad ka Pringchi R Marak na EKHD ha ka liang ki shynrang bad kynthei.
Ha kane ka sngi la ïadon lang u Myntri ka tnat pule puthi jong ka Sorkar Jylla u Rakkam Sangma kum kongsan; kumjuh u Director ka tnat ïalehkai u D. D Shira (MCS), Bah P.B War Nongbri, Additional Director katei ka tnat, Bah Khroobok Passah, Assistant Director, Bah W.L Warjri, Principal ka Shillong Polytechnic Institute bad kiwei kiwei kiba la shah khot sngewbha.
Ha kane ka lympung ba la pynïaid da ka tnat ïalehkai ka Sorkar Jylla bad ka Meghalaya Athletic Association (MAA), ki la don haduh 780 ki khynnah kiba la mihkhmat na baroh 12 tylli ki district jong ka Jylla. La ïadon bynta ban pynïaid da 36 ngut ki official lem bad 200 ngut ki volunteer ha baroh ki jait jingïalehkai.
