Washington, Jymmang:
Uwei u nong India u la shah siat iap ha uwei u runar uba leh mynleh thied jingthied na ka dukan ba utei u nong India u trei, ha kaba u la sei pynban da ka suloi bad siat ia utei u nong India ha katei ka dukan kaba don ha kawei na ki nongbah jong ka United States.
U Paresh Patel, u dei na ka shnong Dingucha jong ka jylla Gujarat hapoh India.
La ong ba utei u nong India u don ha katei ka dukan, ha ka por ba utei u runar u la leit rung sha katei ka dukan bad leh mynleh thied jingthied na katei ka dukan, ha kaba utei u runar na kaba sdang u la pyrshang ban shim jubor ia ka pisa na ka jaka kynshew pisa jong katei ka dukan. Wat la katta, la ong ba u Patel u la ialeh hi ban ïada bad ban ïakhun hynrei ha kaba khatduh utei u runar u la ioh ban siat iap ia u bad u la rah ruh ia ka pisa baroh na katei ka dukan.
Katkum ka jingkheiñ na ka sorkar India, la ong ba ki don 86 ngut ki nong India kiba shah thombor bad shah pyniap shabar ka ri hapoh jong u snem 2023.
U Myntri ka tnat kam bar ri, u Kirti Vardhan Singh u la pynbna hapoh ka iingdorbar thaw aiñ ha une u Nohprah ba la dep, ba napdeng jong kitei ki 86 ngut ki nong India kiba shah thombor bad shah pyniap dusmon shabar hapoh jong u snem 2023, 12 ngut ki dei kiba shah pyniap hapoh United States bad man ki 10 ngut pat ki dei kiba shah pyniap ha kiwei pat ki ri kynthup ia ka Canada, ha United Kingdom bad ha Saudi Arabia.
Namarkata, u Singh u la ong ba ka jingshngaiñ jong ki nong India haba ki mih shabar, ka long kawei na ki mat ba kongsan jong ka sorkar India ba ka dei ban shim khia bad ban pyntikna ia ka jingshngaiñ jongki naduh ka leit- ka wan bad ka shong- ka sah jongki ha kiwei pat ki ri shabar jong ka ri India.
Kumta ia kine ki jingjia baroh ka sorkar India kan iatreilang bad ki bor jong kitei kiwei pat ki ri ban pynioh ia ka hok jong kitei ki nong India bad ban bishar bniah bad wad bniah ruh halor ka jingshah thombor jongki tad haduh ban da lap ia ka daw bad ka jingshisha baroh.
