Itanagar, Jymmang:
Ki Pulit jong ka Arunachal Pradesh ki la kem palat 50 ngut ki nongthoh eksam na Haryana namar ba ki la pyndonkam ïa ki tiar electronic ban leh thok ha ka eksamin thungkam ba la pynlong da ka Navodaya Vidyalaya Samiti (NVS), ong ki heh sorkar ha ka sngi Ba-ar.
Haba kren sha ki lad pathai khubor, u Capital Superintendent of Police u Rohit Rajbir Singh u la ong ba ïa kitei ki jingkem la leh ha kaba ïadei bad ka eksamin kaba la long ha ka Sngi U Blei na ka bynta ki kam Lab Assistant bad Junior Secretariat Assistant (JSA).
La kem haduh 53 ngut ki briew namar ba ki la pyrshang ban leh thok da kaba pyndonkam da ki tiar GSM bad ki Micro Earpiece.
Ki pulit ki la ïoh kurup 29 tylli ki tiar bad ki la ïathuh ba bun na ki suba donkti ki la dep ban phla ïa ka jingdonkti jong ki.
Kane ka jingkhynra, kumba ka paw, ka dei kaba la pynlong da ka kynhun thok kaba don ha Haryana, kaba la kynnoh ba ka la pyndonkam bakla ïa ki jaka leh eksamin ha ki jaka ba jngai kum ha Itanagar bad Dimapur, da kaba ngeit ba kin don ka jingkhmih bniah kaba kham tlot.
Katkum ka jingong u Singh, ki pulit ki la ïoh ban kem ïa 23 ngut ki samla ha ka por ba ki pynlong ïa ka Pre-exam kaba la long ha Kingcup Public School bad sa uwei pat ha Vivekananda Kendra Vidyalaya.
Ka jingtohkit kaba bud ka la pynlong ban kem ïa kiwei pat ki suba donkti ha katei ka kam thok.
Baroh kitei kiba la shah kynnoh, la pynngat ha ki kyndon jong ka Bharatiya Nyaya Sanhita, ka aiñ Information Technology, bad ka Public Examination (Prevention of Unfair Means) Act. La dep ban ujor FIR ha Niti Vihar bad ha Chimpu.
Ki jingtohkit ba nyngkong ki la pynpaw ba ka kynhun runar ka la pynngop ïa ki nongthmu bad ki bahaïing hasem jong ki da kaba ai ïa ka jingjied kaba thikna ha ka jingsiew kaba heh.
Ki la pynkylla ïa ki jingkwah jong ki jaka eksamin, da kaba buh ïa ki kyrtong sha ki jaka ba jngai khnang ban lait na ka jingshah bishar bniah.
Shisien ba la ai ïa ki Admit Card, la hikai ïa ki kyrtong ban pyndonkam ïa ki tiar pyntip ba la buhrieh. “Ki tiar, kiba ju buhrieh ha ki jaiñpoh ne ki shkor, ki pynlah ban ïakren ha ka por ba donkam da ki tiar ba la pyntreikam nabar,” la batai u Singh. “Ki nongthep kam ki la pasiaw ïa u Exam Code, bad ki jubab ki la wan.”
La pyntip sha ka CBSE halor katei ka jingpynkheiñ, bad la phah ïa ki kynhun pulit sha Haryana ban wad ïa ki nongpynïaid bad ki nongpynïaid pdeng kiba don shadien jong katei ka jing-leh thok.
Ki jingjia thok kiba kum kine ki la mih ha Gangtok, Chandigarh, bad Shimla, kaba pyni ba ka don ka Network ha baroh kawei ka ri.
Ki bor synshar mynta ki la sdang ïa ka jingtoh-kit kaba kham bniah halor ka jingjia.
