Shillong, Jymmang 22
U Myntri ba khmih ïa ka tnat Revenue & Disaster Management, Bah Kyrmen Shylla, u la ai jingmut ïa ka Sorkar Assam ban ym kynnoh ïa ka Meghalaya halor ka jingshlei um hynrei ban pynbiang ïa ki sakhi sabut ha shuwa ban kynnoh ba ka jingshlei um ka dei namar ba leh khnang ka Meghalaya.
Haba kren sha ki lad pathai khubor, na ka liang jong u Bah Kyrmen u la ong ba ka jingkynnoh ka lah ban don hynrei kum ki nongmihkhmat, hap ban pynshisha ïa kane ka jingkynnoh bad ki dei ban jurip bha bad lada ka don ka jingshisha halor kane ka jingkynnoh.
“Hynrei haduh mynta ruh ka tnat kam pat ïoh kano-kano ka jingujor halor kane ba dei namar ka Meghalaya sa shlei um ha Assam. Ka jingslap ka dei ka bor mariang bad ka Meghalaya ka don hajrong bad ka Assam hapoh namar kata ka um ka hap ban tuid shapoh. Ym da donkam ban kynnoh ïano-ïano ruh,” la ong u Bah Kyrmen.
Shuh shuh, u Bah Kyrmen u la ai jingmut, ba ka Sorkar Assam ka donkam ban shna bha ïa ki nala um khnang ba kin lait na ka jingshlei um. “Kaba donkam hangne ka long ban wad ïa ki lad ki lynti ban lait na kane bad nga tharai ka Assam ka dei ban shna ïa ki nala kiba biang ban lait na ka jingdap um ha Assam, lada ki la lah ban leh ïa kane, ka Assam ka la lait hi na ki jingshlei um,” u la ong.
Haba ïadei bad ka jingshlei um bad twa khyndew hapoh ka Jylla namar ka jingjur slap, u Myntri u la ong ba ka tnat ka ju peitngor man ka por halor ka jingtwa ka khyndew. “Hynrei ha kaba ïadei bad ka jingtwa khyndew kaba dang shen, ngam pat ïoh jingtip eiei hynrei ki ophisar ki don ban peitngor khnang ban ïada na ka jingkhlad bad ka jingmynsaw ki briew bad ban weng ki jingeh jong ki paidbah lada jia ka jinglynshop ka mariang,” u la ong.
