Shillong, Jymmang 22
Ki shipai Border Security Force (BSF) kiba pahara ha khappud ki la ïoh ban kurup haduh shispah kilo ka shini, kata hadien ba ki la siat pynma ar sien sha suiñ.
Katkum ka khubor kaba la ïoh na ki pulit la ong ba u SI Jiban Bohmik jong ka 193rd Bn., BSF, BOP Rajapara ha South West Khasi Hills u la ai ka jingujor ba ha ka 19 tarik mynta u bnai, kata dang ha ka por 4.15 mynstep, ki BSF ki la ïohi ïa ka jingdon jong ki runar bym lah ban ithuh ne ki nongkhaïi tuh ha baroh arliang jong u pud kiba dang pyrshang ban ïa khaïi tuh.
La ong ba ha kane ka por, na ka liang jong ki BSF ki la siat pynma sha suiñ haduh ar sien, ha kaba ki runar ne ki nongkhaïi tuh ki la phet krad noh na kane ka jaka bad ieh shadien ïa ki mar. Kham hadien haba ki BSF ki la hiar sha kane ka jaka, ki la ïoh ban kurup noh haduh 100 kilo ka shini kaba la iehnoh da ki nongkhaïi tuh.
