Shillong, Jymmang 22
Ka Meghalaya ka la wan ha ka kyrdan ba san ha ka thup jong shiphew tylli ki jylla hapoh ka Ri India ba bun tam kiba la nang la stad lane kiba la nang ban thoh bad pule katlum ka jingkheiñ ha u snem 2023-2024.
Ka Meghalaya ka la wan ha ka kyrdan ba san da kaba ka la kynjoh sha ka 94.2% ka Literacy Rate na ka 74.43% kaba la ïoh katkum ka jingkheiñ khana samari ha u snem 2011.
Kum ban pynkynmaw, ka Mizoram ka la ïoh ïa ka kyrdan ba nyngkong ha ka ri India, ba baroh ki nongshong shnong ki la nang la stad ha kaba u Myntri Rangbah katei ka jylla u Lalduhoma u la pynbna ha ka Sngi Ba-ar ka 20 tarik Jymmang, 2025 ba ka jylla Mizoram ka la ïoh ïa ka kyrdan ba la nang ban thoh ban pule la palat ïa ka 95% kumba la buh da ka tnat pule puthi ka Sorkar India.
Katkum ka khana samari jong u snem 2011, ka Mizoram ka la wan ha ka kyrdan ba lai na ki jylla hapoh India ha ka jingbun kiba la nang ban thoh ban pule ha kaba ka la ïoh 91.33% ka literacy rate hynrei mynta ka la poi sha ka 98.2%, katba ka Kerala kaba la bat ïa ka kyrdan ba nyngkong ha ki snem ba la dep, mynta ka la wan ha ka kyrdan ba san.
Na ka thup jong shiphew tylli ki jylla bad ki union territory hapoh India kiba don shibun kiba la nang ban thoh bad pule ki kynthup ïa ka Mizoram kaba la wan ha ka kyrdan ba nyngkong da kaba ïoh 98.2%, kaba wan ba ar dei ka Lakshadweep 97.3%, kaba wan ba lai dei ka Nagaland 95.7%, ba saw ka Kerala 95.3%, ba san ka Meghalaya 94.2%, ba hyniew ka Tripura 93.7%, ba hynñiew ka Chandigarh 93.7%, ba phra ka Goa 93.6%, ba khyndai ka Puducherry 92.7% bad ba shiphew dei ka Manipur 92%.
Katba ki jylla bad ki Union Territory kiba don ha ka thup ‘top 10’ ha ka jingduna bha kiba la nang la stad ki kynthup ba nyngkong ka Andhra Pradesh, ba ar ka Bihar, ba lai ka Madhya Pradesh, ba saw ka Rajasthan, ba san ka Jharkhand, ba hynriew ka Telengana, ba hynñiew ka Uttar Pradesh, ba phra ka Chattisgarh, ba khyndai ka Ladakh bad ba shiphew ka Jammu & Kashmir.
La sakhi ruh ba ki jylla ka thaiñ shatei lam-mihngi (Northeast) ki la kham kiew ha ka liang ka pule puthi ha kaba ki la don haduh san tylli ki jylla kiba la poi ha ka thup ‘Top 10’ katkum ka jingkheiñ ha u snem 2023-2024.
Ka ri India ka don tang 14% kiba la nang la stad ha ki por ba ka la ïoh ïa ka jinglaitluid hynrei katba nang ïaid ki snem ka la nang kiew ha kaba ki briew ki la ïoh ïa ka jingnang jingstad kaba janai. Katkum ka jingkheiñ ha u snem 2022 ka India ka la ïoh 76.32% ka Literacy rate.
