Khliehriat, Jymmang 23
Ka Jaiñtia National Council Khliehriat Circle (JNC) ha ka 23 tarik Jymmang ka la ïoh ban bat ïa ar ngut ki samla kiba la kyrni ha u drok ha kawei na ki jaka hapoh ka thaiñ Khliehriat.
Ïa u drok bad thyrnia ba la ïoh kurup na kine ki samla, ka seng ka la thang lut ïa ki.
Ka JNC ha u kyrwoh ba ka la phah ka la ong, hadien ka jingïoh bat ïa kitei ki samla hapoh ka jingïalam u Working President, Diamon Bareh bad General Secretary, Symboh Ba-ïar Sumer ka la ïalam ïa ki sha ïing treikam jong ka JNC ha Khliehriat ban pynlong ka jingïasyllok bad ki bad la pyntip ruh sha ki bahaïing bahasem jong ki.
Ka JNC ka la ong ha ka jingïakren bad kine ki samla, ki la phla ba ki bun ki nongkhaïi drok hapoh ka distrik.
Ka JNC-Khliehriat Circle ka la pynpaw ka jingsngewkhia halor ka jinglaitlan ki nongkhaïi drok hapoh ka thaiñ bad ka kyntu ruh ïa ka Sorkar bad ki bor ba dei khmih ïa kane ka kam ba kin leh ïa kaba donkam tam.
Ka seng ka ong ba kan ïai bteng ban khynra naphang ïa ki nongkhaïi bad nongdih drok hapoh ka thaiñ.
Ka JNC ka kyntu ruh ïa ki kmie ki kpa, ki dorbar shnong, ki seng longkmie ban mih shakhmat ban ïatreilang ban rat dyngkhong ïa u drok napoh kane ka distrik bad Jylla baroh kawei.
