Shillong, Jymmang 23
Ka Sorkar Delhi ha ka Sngi Thohdieng ka la pynmih ïa ki jingpynbna haba ïadei bad ka jingpang COVID-19 bad bthah ïa ki jaka sumar ban pynkhreh ha ka liang ki jingthiah, ‘Oxygen’, dawai bad ka jingai tika.
Namar ka jingnang kiew ba dang shen ha ka jingdon ki nongpang kiba shah ktah ha ka COVID-19, ka kyrwoh na u Spl. Secretary (H& FW) ka Sorkar ka NCT, Delhi, ka la pynkynmaw bad kdew biang ïa ki jingdonkam ban pyntikna da ki Medical Direc-tor/ Medical Superin-tendent/ Administrator jong baroh ki jaka sumar Sorkar bad shimet.
“Pyntikna ba ki ‘Hospital’ ki long kiba la khreh ha kaba ïadei bad ka jingdon ki jingthiah, ‘Oxygen’, ‘Antibiotics’ & kiwei-kiwei ki dawai bad jingai tika. Baroh ki tiar kum ki ‘Ventilator’, ‘Bi-Pap’, ‘Oxygen Concen-trator’, PSA bad kiwei-kiwei ki dei ban don ha ka jinglong-jingman kaba lah ban treikam,” ong ka kyrwoh.
Ka kyrwoh ka ong ruh ba lah ban pynlong ïa ka jingai jinghikai bathymmai na bynta ki nongtrei.
Ha kajuh ka por, dei ban phah ïa ka jingpyntip ba man ka sngi halor ki jingpang kum ka Influenza-like Illness (ILI) & Severe Acute Respiratory Illness (SARI) ha baroh ki jaka sumar (OPD/IPD) sha ka rynsan Integrated Health Information Platform (IHIP).
Ka kyrwoh ka ong ruh ba lah ban pyntip ïa kito kiba la tikna ba ki don ïa ka jingpang ‘Influenza’ bad COVID-19 ha ka IHIP hapoh jong ka ‘L form’ nalor ka jingai jingtip ba man ka sngi ïa baroh ki jingbuh kyndon ha ka rynsan jong ka Delhi State Health Data Management Portal.
Utei u heh ophisar u la ban jur halor ka jingpeit bniah kaba biang katkum ki kyndon peit bniah ka COVID-19, kumjuh ban pyntikna ïa ka jingpeit bniah na bynta ka COVID-19 ha 5% ki nongpang ILI & 100% ki nongpang SARI.
“Phah ïa baroh ki nongmuna ba shah ktah ha ka COVID-19 na bynta ka ‘Whole Genome Sequencing’ (WGS) sha Lok Nayak Hospital khnang ban lap biang por ïa ki jait khñiang bathymmai, lada don, bad ban ïasam ïa ka jingdon jong ki nongmuna ba la phah na bynta ka WGS bad ka State Surveillance Unit,” u la ong.
Shuh shuh ka kyrwoh ka ïathuh ba la bud ryntih ïa ki rukom bad akor ba ïadei bad ka jingring mynsiem, kynthup ïa ka jingdeng ‘mask’ ha ki jaka sumar.
