Jowai, Jymmang 23
Kiba bun ngut ki ‘riew shimet, kynthup ïa ki ‘riew paidbah bad ki samla ki la ïoh jingmyntoi na ka ‘Free Health Check-Up Camp’ ba la pynlong da ka Society for Urban and Rural Empowerment (SURE) ryngkat ka jingkyrshan ka Project Regeneration Meghalaya bad ki nongtrei jong ka Jaraiñ PHC hapoh ka jingïalam jong u Dr. F. Lamin ïa kaba la pynlong ha Amlarem Secondary School, Amlarem ha ka 22 tarik, Jymmang.
U Dr. S.N. Goswami, Chief Operating Officer of Project Regeneration Meghalaya u la batai lyngkot halor ka jingthmu jong ka projek ban pynthymmai ïa ka khyndew bad ka mariang jong ka Jylla da kaba thung ïa ki dieng.
U la kdew ba bun ki Seng Kur bad ki jaidbynriew ha ka Jylla ki la sdang ban ïatreilang bad ka Project da kaba ai lad ïa ka ban thung dieng ha ki jaka ba rben ba ki don.
U Dr. Goswami u la ong ruh ba kane ka projek ka thmu ban poi sha ki paidbah nongshong shnong, bad ka jingpynlong ïa kum kine ki jingai jingsumar ka dei kawei na ka thong.
U Rev. F. Pohshngap, Secretary ka Kur Pohshngap uwei na ki nongïashim bynta ha ka Regeneration Meghalaya Project ha ka thaiñ Amlarem, u la ïaroh ïa ka jingpyrshang jong ka Project bad u la pynpaw ka jingkyrmen ba kane ka projek kan long kaba jop.
U Pastor Pohshngap u la ong ba kane ka projek ka long kaba kyrpang namarba ki trai jaka ki don bynta shitrhem ha kaba thmu bad pyntreikam ïa kane ka jingthmu lyngba ka jingpynrung ïa ki ha ka ‘Multi-Stakeholders Platform’.
U Dr. F. Lamin, Medical Officer ka Jaraiñ PHC u la kren halor ki jingeh ha ka koit ka khiah kiba ktah ïa kane ka thaiñ.
U la pynpaw ïa ka jingsngewkhia kaba jur halor ka jingkiew jong ki nongpang HIV ha ka thaiñ Amlarem bad ka jingshongkha khynnah da kaba u kyntu ïa ki khynnah skul ban kiar na ka shongkha khynnah.
U Dr. Ajay Sharma, Director jong ka Corporate and State Affairs jong ka AstraZeneca India u la ong ba ka kompeni ka sngewkmen shibun eh ban don bynta lang ha ka Project Regeneration Meghalaya, kaba la pyntreikam ha Meghalaya bad kyrmen ba kine ki jingpyrshang kin lah ban ïarap ban ïakhun pyrshah ïa ka jingkylla ka suiñbneng. U la ong ba lyngba kane ka projek yn thung 6 klur tylli ki dieng ha ka Jylla.
Kiwei kiba la ai jingkren ki long Coriniki Slong, District Resource Person, Banisha Lamar, Zonal Supervisor jong ka Link Workers Scheme kaba hap hapoh ka SURE.
