New Delhi, Jymmang 23
Ka ‘Reliance Industries’ bad ka ‘Adani Group’ ki la ai ïa ka jingkular ban bei tyngka na bynta ka Thaiñ Shatei Lam Mihngi ha ka ‘Rising Northeast Investors Summit 2025’ kaba la long ha Bharat Mandapam, New Delhi ha ka Sngi Thohdieng.
Ki kompeni ki la kular ruh ban bei T.75,000 klur bad T.50,000 klur – kaba pyni ïa ka jingkyrmen skhem jong ki ha ka jinglah jong ka thaiñ haba phai sha ka ïoh ka kot.
Ha kane ka jingïalang, u Chairman ka ‘Reliance Industries’, Mukesh Ambani u la pynsngew ïa ka buit treikam ba ïohi jngai jong u na bynta ki Jylla ka Thaiñ Shatei Lam Mihngi kynthup ïa ka Arunachal Pradesh bad Nagaland.
“Ha ki por ban sa wan, nga lah ban ïohi ba kine ki thaiñ kin sa bud nuksa ïa ka jingjop jong ki ri ba marjan kum ka Singapore,” la ong u Ambani katkum ka khubor jong ka ET.
Haba ïadei bad ki jingthmu bei tyngka jong ka Reliance na bynta ka Thaiñ Shatei Lam Mihngi, ka jingbei tyngka jong ka Reliance kaba don mynta, kaba T.30,000 klur ha ka Thaiñ Shatei Lam Mihngi ka la neh la 40 snem, ha ryngkat ki jingthmu ban kyntiew mynta ïa kane ka jingkheiñ sha ka T.75,000 klur.
U Ambani u la batai bniah halor ki 6 tylli ki jingkular ba kongsan ban kyntiew ïa ki Jylla ka Thaiñ Shatei Lam Mihngi, da kaba kdew ïa ka jingkiew ha ka jingïadon bynta jong ka Reliance ha ka thaiñ. Ka kompeni ka thmu ban kyntiew ïa ka jingim jong 45 ‘million’ ngut ki nongshong shnong ka Thaiñ Shatei Lam Mihngi, ha kajuh ka por, ban pynmih palat 2.5 ‘million’ tylli ki lad ai kam ai jam.
Ka jingshakri jong ka ‘Jio’ sha ka ki nongshong shnong ka thaiñ mynta ka la kynjoh sha ka 90%, ha kaba ki don 5 ‘million’ ngut ki nongpyndonkam ‘5G’, da ka jingthmu ban pynkiew arshah ïa kane ka jingkheiñ hapoh mynta u snem.
U Ambani u la ban jur ïa ka jingpynleit jingmut jong ki ban pyntreikam ïa ka ‘Artificial Intelligence’ ha kylleng ki jaka pule, jaka sumar, kam khaïi, bad ki longïing hapoh ka thaiñ.
“Haba ka sap ka ïakynduh ïa ka teknoloji bad ka jingtbit ka ïakynduh ïa ka jingpynïasoh, ka Thaiñ Shatei Lam Mihngi jong ngi kan kiew shaphrang,” u la ong.
Ha ki kam die mar, ka ‘Reliance’ ka thmu ban pynïar ïa ki kam thied kam pet jong ka na bynta ki marbam ba kongsan, ki mar rep, bad ki jhur, ka ban ai jingmyntoi ïa ki nongrep ha ka thaiñ ha ryngkat ka jingbei tyngka ha ki FMCG bad ban kyrshan ïa ki nongtrei kti napoh ka thaiñ.
Ki sienjam ban pynmih bording kaba khuid ki kynthup ïa ka jingpynheh ïa ka ‘Solar Power Capacity’ bad ban pynroi ïa 350 tylli ki jaka pynmih ‘Biogas’, ban pynkylla ïa ki jaka bym pat pyndonkam sha ki jingdon-jingem ki ban ai jingmyntoi.
Ha kaba ïadei bad ki jingshakri ha ka koit ka khiah, ka thong ba hakhmat eh jong ka ‘Reliance Foundation’ ka long ban pynbiang ïa ki jaka sumar bampong kiba kham bha sha ka thaiñ, da kaba sdang ïa ka jaka sumar kyrpang na bynta ka bampong kaba don 150 tylli ki jingthiah ha Manipur, ryngkat ki jingïatreilang ha ka liang ka jingwad bniah bad ka skulbah Mizoram ka ban pynleit jingmut ha ki jingpule ba ïadei bad ka ‘Breast Cancer’ bad ki jingpule haba ïadei bad kiwei-kiwei ki jingtip.
Haba phai pat sha ki jingthmu bei tyngka jong u Gautam Adani na bynta ka Thaiñ Shatei Lam Mihngi, une u Chairman ka Adani Group, u la pynbna ïa ka jingthmu ban bei tyngka sa T.50,000 klur ha ka Thaiñ Shatei Lam Mihngi ha kine ki shiphew snem ban wan.
U la batai ïa ka Thaiñ Shatei Lam Mihngi kum ka thaiñ kaba lah ban ïaleh pyrshah ha ryngkat ki lad ki lynti ki bym pat lah ban wad bniah, da kaba ai khublei ruh ïa ka jingpynleit jingmut ba kongsan jong u Myntri Rangbahduh ka ri, u Narendra Modi halor ka jingkiew ka ïoh ka kot jong ka thaiñ.
Kane ka jingbei tyngka bathymmai na ka ‘Adani Group’ kan pynleit jingmut ha ka ban pynroi ïa ki jingtei, ki lad pynïaid kam ïaid jam, ki projek bording bad ki lad pynïasoh ‘digital’, nalor kiwei.
