Shillong, Jymmang 23
Ka U Soso Tham Auditorium ka dei kawei na ki hall ne ka ‘Auditorium’ kaba ju paw bha namar kiba bun ki ‘riewpaidbah, ki jaka pule, ki sengbhalang, ki kynhun niam, ki Tnat Sorkar bapher-bapher ki ju pynlong ïa ki prokram ne ki jingïalang na ka bynta ki jingdonkam ba har rukom.
Haba kwah ban pyndonkam ïa katei ka hall, ki ‘riewpaidbah ne ki kynhun bapher-bapher ki lah ban ‘book’ lypa ïa katei ka ‘hall’ ha ka dor ba la buh bad katei ka ‘hall’ ka dei ruh kaba don bun bha kiba kwah ban pyndonkam ïa ka.
Hynrei kaba sngew-sih pat ka long ba wat la ïa kane ka ‘Auditorium’ ki don bun bha ki briew kiba pyndonkam ïa ka ban pynlong ïa ki prokram bapher-bapher bad dang ha kine ki khyndiat snem ba la dep ruh, ïa kane ka ‘Auditorium’ la pynbha ïa ka hynrei la sakhi pat ba ka bynta kaba shapoh ne ka rynsan ka la jot rathai bha bad lada ïaid ki briew ruh ka long kumba kan ngam shapoh.
Lehse, ka jingbym shna da ki tiar kiba bha ka lah ban dei ka dawbah jong ka jingjot kloi ne lehse ïoh ka don da kiwei-kiwei ki daw ruh.
Lada na ka liang ka tnat ba dei khmih kam maramot kham kloi ïa kane ka bynta bad lada ki skul ne ki kynhun bapher-bapher kiba shim wai ban pynlong ïa ki prokram ha katei ka ‘Auditorium’, hato ka buh jingma ne em ïa ki briew namarba ha kano-kano ka por ka rynsan ka lah ban kdiah bad hap kaba buh jingma pat ïa kiba pyndonkam ïa ka.
Ka jingkylli ka mih hangne ba hato kiba dei peit ïa kane ka jaka kim ïohi ïa ka jingjot jong ki jingsiang ha katei ka rynsan kaba buh jingma ïa kiba pyndonkam ïa ka?
Na ka liang U Nongsaiñ Hima u la lap ïa ka jingjot jong kane ka bynta haba leit ban leh khubor ïa kawei ka prokram jong ka Tnat Sorkar kaba la pynlong ha kane ha ‘Auditorium’.
