Guwahati, Jymmang:
Haba khmih bniah halor ka jingshlei um bad ka aïom slap ka ban sa wan ha kane ka jylla, ka Assam State Disaster Management Authority (ASDMA) ka la bthah ïa baroh ki distrik kiba don jingma na ka jingtwa khyndew ban ithuh lypa bad pynkhreh ïa ki jaka sah ba shipor kiba shngaiñ na ka bynta ki briew kiba shah ktah ha ka jingtwa khyndew ha ka por Lyiur.
Kane ka jingbthah kaba la pynmih ha ka sngi Palei ka thmu ban pynduna ïa ka jingduh ïa ki mynsiem briew kiba lah ban mih na ka jingtwa khyndew ha kane ka aïoom shlei um bad slap. Ka ASDMA ka la pynmih ïa ki jingbthah ba thikna sha ki distrik kum ka Cachar, Dima Hasao, Hailakandi, Kamrup, Kamrup Metro, Karbi Anglong, West Karbi, Sri.
Kine ki distrik ki don ka kamram ban ithuh mardor ïoa ki jaka ba lah ban shah twa khyndew bad ban pyntip paidbah sha ki nongshong shnong shaphang ki jaka ri khunswet ba la buh kyrpang. Ka ASDMA ka la ong ba “ka jingpynbna paidbah kaba jylliew” kan ïarap ïa ki briew kiba shah ktah ban suk ban wad bad leit sha kine ki jaka sah ba la buh khnang ban ai jingïada lada jia ba don ka jingtwa khyndew.
Da kaba shim khia ïa ki jingjulor na ka jingtwa khyndew ha ki lai snem ba la dep ha Cachar, Dima Hasao, Kamrup Metro, bad Sribhumi, u Gyanendra Dev Tripathi, Heh Executive Officer jong ka ASDMA, u la kyntu ïa ki nongshong shnong ha ki jaka ba don jingma bha ban pynkynriah noh da ka mon sngewbha sha ki jaka ba kham shngaiñ ha ka por slap kaba ki jied. U la ong ba kane ka sienjam kaba stet ka long ban pynduna shibun ïa ka jingshah ktah jong ki ha ka jingtwa khyndew.
