Los Angeles, Jymmang:
Katkum ki khubor, la iathuh ba 2 ngut ki la khlad noh na ka jingleit hap bakla ka liengsuiñ ha kawei ka iing briew ha San Diego bad 8 ngut kiwei pat ki la mynsaw lem katto- katne ki kali ki la julor lang ha katei ka jingjia.
Kane ka la jia ha ka por kumba 3:45 jong ka step Sngi Palei ha kawei ka iing shipai hapoh Tierrasanta.
Ia mynta hi ym pat lah ban ai ia ka jingkheiñ ba tikna bad ym pat lah ruh ban tip katno ngut ki don kiba shong ha katei ka liengsuiñ hynrei ki pulit ki iathuh ba ki ngeit ba ym shym don kiba khlad na katei ka jingjia hynrei dei tang kiba shong hapoh ka liengsuiñ hi.
Ha ka por ba ki briew ka tnat pynlip ding ki leit poi sha katei ka jaka, ki lap ia katei ka iing bad katto-katne tylli ki kali kiba la kem ding bad julor.
Ka tnat pulit na San Diego ruh ka la pyntip ba ha katei ka jingjia, 2 ngut ki la khlad hashen bad 8 ngut pat ki la mynsaw.
Napdeng jong kitei kiba mynsaw, tang uwei u dei uba shu mynsaw malu- mala hynrei ka pynkit lang ia u sha kajuh hi ka jaka sumar ba la pynkit ia ki baroh.
Hadien kane, ki bor pyniaid ki la pynkynriah noh ia palat 100 ngut ki paidbah nongshong shnong ka ki iing kiba don ha katei ka thaiñ ha katei hi ka step Sngi Palei.
Ia katei ka liengsuiñ la ju tip kum ka ‘Cessna 550’, kaba hap hapoh ka jingpyniaid jong ka Federal Aviation Administration.
Katei ka liengsuiñ ka thmu ban leit hiar sha San Diego hynrei da ka jingbym lah tehlakam shuh, ym lah ban tip la ka dei na ka daw ka jingthut ka liengsuiñ ne ka jingbym biang ha ka rukom treikam u nongñiah hynrei ki tnat ba dei khmih kin dang wad bniah halor kane ban lap ia ka daw tynrai halor ka jingleit hap bakla katei ka liengsuiñ ha katei ka sngi.
Ia kane yn sa buddien bad wad bniah da ka tnat Federal Aviation Administration bad ka National Transportation Safety Board.
