Nongpoh, Jymmang 23
Kum shi bynta ban ai rynsan ïa ki nongseng kam sengjam ha ka thaiñ Nongpoh bad Ri-Bhoi District baroh kawei, ka ‘PRIME Meghalaya’ mynta ka sngi ka la ïoh ban plie paidbah ïa ka shnat treikam jong ka, kaba la tip kum ka ‘PRIME Startup Hub’ ha Nongpoh.
Ïa kane ka shnat treikam, la wan ban plie paidbah da u Bah Jonathan Shylla, Additional Deputy Commissioner jong ka Ri-Bhoi District.
Ha kane ka sngi, la wan ruh ban ïadon ryngkat da u Pranjal Konwar, Chief Operating Officer ka IIMCIP, u Bah Keningstar Nongrum, Administrative Head ka PRIME Hub bad kiwei-kiwei de ki heh ophisar nalor ki nongseng kam kynthup ïa ka trai jong ka ‘EriWeave Pvt Ltd’, ka Kong Ïaishah Rymbai lem bad kiwei-kiwei ki nongsengkam sengjam jong ka thaiñ.
Ka jingplie ïa kane ka shnat treikam jong ka PRIME Hub ha Nongpoh kan ban pynshlur bad pynsuk shi kat dei ïa ki nongsengkam ka thaiñ ba kin ïoh ïa ka jinghikai, ka jingai jingmut bad ban ïarap ïa ki kumno ba kin lah ban kyntiew bad pynïaid ïew ïa ki kam ki jam jong ki shaphrang.
Haba kren ha kane ka sngi, na ka liang u Bah Jonathan Shylla, u la pynpaw ïa ka jingsngewkmen ba la ïoh ban plie ïa kane ka shlem ka ban ai jingmyntoi shi kat dei ïa ki briew kiba kwah ban sengkam sengjam bad kyntu ruh ïa ki paidbah ba kin shim kabu ban wan mih sha kane ka shlem ba kin ïoh ïa ki jingmyntoi kiba ka Sorkar lyngba kane ka shnat treikam ka don ban ai sha ki.
