Khliehriat, Jymmang 23
U Deputy Commissioner, East Jaiñtia Hills District, u la pyntip ba haduh 3000 Metric Ton u dewïong ba la tih beaiñ la ïoh ban kurup bad pynkynriah noh sha ka jaka buh dewïong jong ka Coal India.
Kane ka jingïoh kurup ka la long hadien ba ki bor pulit ka District ki la pynlong ïa ka jingleit jurip mar ïa ïoh jingtip ha kaba ïadei bad ka jingdon jong u dewïong ba la tih beaiñ ïa uba la lum thup ha ka jaka khlaw ha ka shnong Lum Bangla.
Ïa kane ka jingleit jurip la pynlong da kaba bud ryntih ïa ki kyndon jong ka MMDR Act ha kaba la lap ïa u dewïong ba la lum thup shabar ka jaka ba la ithuh da ka sorkar.
Katkum ka kaiphod, ka jingïoh jingkheiñ na u Divisional Mining Officer baroh une u dewïong ba la ïoh kurup u don haduh 3000 Metric Ton.
