Shillong, Jymmang 23
Ka nongsiat suloi ‘skeet’ jong ka India, ka Raiza Dhillon ka la khur ïa ka takma rupa ha ka ISSF Junior World Cup 2025 kaba long ha Suhl, Germany, katkum ka Olympics.com.
Kane ka nongsiat suloi ka ri kaba dang 21 snem ka rta, kaba la ïoh khur ïa ka takma rupa ha ka sngi Palei ha ka Asian Championships, ka la ïoh ban siat 51 napdeng 60 tylli ki jingsiat ha ka phainal, katba ka nongïalehkai kaba na Great Britain ka Phoebe Bodley-Scott kaba la siat 53 na ka bynta ban khur ïa ka takma ksiar.
Kane ka dei ka takma ksiar kaba ar jong ka Bodley-Scott ha ka Junior ISSF World Cup hadien ba ka la jop ïa kajuh ka jingïalehkai ha kajuh ka jaka lai snem mynshwa. Ka Annabella Hettmer na Germany ka la ïoh ban khur ïa ka takma rnong da kaba siat 38.
Kham hashwa ha kane ka sngi, ka Raiza Dhillon ka la lah ban ïalehkai bha ha kaba ka la wan ba-ar ha ka Qualifying Round da kaba ïoh 116. Kiwei pat ki nongïalehkai ka India kum ka Vanshika Tiwari (109), ka Yashasvi Rathore (106) bad ka Mohika Sisodiya (100) ki la wan ha ka kyrdan 15, 19 bad 28 ha ka jingïaknieh rung.
Katba ha ka jingïakhun ‘skeet’ jong ki shynrang, u Harmehar Singh Lally jong ka ri u la duh noh ïa ka jaka ha ka phainal tang shi kyrdan. Ka jinglah jong u ban ïoh 117 poiñ ka la pynlong ïa utei u nongsiat na India ban wan ha ka kyrdan kaba hynñiew ha ka qualifier. U Zorawar Singh Bedi u la wan ha ka kyrdan kaba 29 ryngkat 112 poiñ, katba u Ishaan Singh Libra (111), u Jyotiraditya Singh Sisodiya (110) bad u Atul Singh Rajawat (105) ki la wan ha ka kyrdan 35, 38 bad 54.
Kumjuh, ar ngut ki rangïalehkai ka India, kita u Urva Chaudhary bad u Chirag Sharma ki la duh da ka said ban khur ïa ka takma rnong ha ka 10m air pistol mixed (team) ha kaba ki la wan ha ka kyrdan ba san ha ka ‘qualifying’ ryngkat 576-14x.
Mynta ka India ka la don ha ka kyrdan khlieh duh ha ka Suhl ISSF Junior World Cup da kaba ïoh lai tylli ki takma – kawei ka takma ksiar bad ar tylli ki takma rupa. Kumba ka paw ka India ka la phah 57 ngut ki nongïalehkai sha katei ka lympung.
