Imphal, Jymmang:
Ka Commission of Inquiry (CoI) kaba tohkit halor ka jingshah thombor jong ki jaitbynriew ha Manipur, ka la shah ban pynjlan por biang ha ka sien kaba lai, ha kaba la buh por thymmai ban aiti ïa ka kaiphot sha ka sorkar pdeng hapoh ka 20 tarik, Naiwieng, 2025.
Ka tnad kam pohïing ka la pynpaw ha ka jingpynbna ba khatduh ba dei ban aiti ïa ka kaiphot “kloi katba lah hynrei ym palat ïa ka 20 tarik u Naiwieng, 2025.”
Katkum ki tyllong khubor, ka CoI, kaba la thaw da ka MHA ha ka 4 tarik u Jylliew, 2023, la bthah nyngkong ban aiti ïa ki jinglap jong ka hapoh hynriew bnai naduh ka jingïalang kaba nyng-kong, hynrei ka jinglong jingman kaba jylliew ka la pynlong ïa kine ki jingpynjlan por bunsien.
Ka jingpynjlan por jong ka komishon mynshwa ka long haduh ka 20 tarik u Jymmang, 2025.
Ha ka khlieh jong u Chief Justice barim ka Gauhati High Court, u Ajai Lamba, kane ka komishon ka dang minot bha ban lum ïa ki sakhi sabut bad ka la dep ban ïoh kumba 11,000 tylli ki sakhi ban pynshisha. Ka CoI ka dang pdiang ruh ïa ki jingujor bad jingkynnoh na kino kino ki riew shimet ne ki seng.
Kaba kham pawnam ka long ba ka jingïakynad jaitbynriew kaba dang ïaid shakhmat hapdeng ki jaitbynriew riewlum Kuki-Zo-Hmar bad ki jaitbynriew Meitei, kaba la jia ha ka 3 tarik u Jymmang, 2023, ka la wanrah ïa ka jingduh ïa kumba 250 tylli ki mynsiem briew.
Ka jingkulmar kaba la saphriang ka la wanrah ruh ïa ka jingpynjot ïa ki hajar tylli ki mar ki mata bad ka jingshah pynkynriah jaka jong palat 60,000 ngut ki briew na ki ïing ki sem jong ki.
Hadien ka jingieh-nohkam jong u Myntri Rangbah jong ka Manipur, ka sorkar pdeng ka la pyntreikam noh da ka President’s Rule ha Manipur ha ka 13 tarik, Rymphang, 2025, naba la jur ki jingkhihwin.
Ka jingbthah jong ka CoI ka long kaba bniah bha, kaba thmu ban wad bniah ïa ki daw tynrai bad ka jingheh jong ka jingshah thombor, ka jingïaid lynti jong ki jingjia, bad ban tip lada don kino kino ki jingbakla ne jingbym leh ïa ka kamram da ki bor synshar ne ki briew kiba don ka jingkitkhlieh.
