Mawkyrwat, Jymmang 23
Ka Nonglang SC ka la pynhap pyrda noh ïa ka lympung ïalehkai Golden Jubilee Celebration Football Tournament 2024-25 ha ka sngi Thohdieng ha kaba ka Evergreen SC ka la long kum ka lahduh hadien ba ka la pynliem noh ïa ka Ryntihlang FC da 3-2 kol ha ka jingïakhun final kaba la long ha madan Pyndenïew Lyngdoh, South West Khasi Hills District.
Kane ka jingïakhun ka la long kaba itynnad bad kaba ïakhaid bha ha kaba baroh ar tylli kynhun ki la pyrshang ban ïakhun tyngeh naduh kaba sdang. Ha kum kane ka jingïakhun ka Evergreen ka la ïoh ban pynkhih jar nyngkong eh lyngba u Donlad Diengdoh ha ka minit kaba 18.
Haba phai sha ka kylla miet, mar ïa sdang ka jingïalehkai, ka Evergreen ka la pynbud biang ïa ka kol kaba ar lyngba u Fullmoon Mukhim ha ka minit kaba 51. Wat la ka Ryntihlang ka la thep ar kol, hynrei da ka jingtrei shitom ki rangïalehkai ka la pynlong ïa kane ka kynhun ban pynphai kylla ha ka minit kaba 67 lyngba u Macdonald Lyngkhoi.
Hapdeng kane ka jingïakhun ka Evergreen ka la ïoh ban thep biang ïa ka kol kaba lai lyngba u Donlad Diengdoh ha ka minit kaba 73. Wat la ka liang pyrshah ka la ïaleh tyngeh ban pynphai ïa kitei ki kol, hynrei ha shwa ban wai ka la lah ban pynphai sa tang shi kol lyngba u Morning Khongkieng ha shwa ba kan mad syndon ïa ka jingshah rem.
Da kane ka jingjop, ka Evergreen SC kum ka lahduh ka la ïohpdiang ïa ka song pisa kaba T.1,30,000 ryngkat ka trophy bad ka Ryngtihlang kaba wan ba ar ka la ïoh T.70,000 ryngkat ka trophy. Ïa ka nam Best Player ha katei ka sngi la ïoh da u Donlad Diengdoh jong ka Evergreen uba thep ar kol, ka Man of the Match ka leit sha u Fullmon Mukhim, Top Scorer sha u Manbha Ïawphniaw bad Best Goalkeeper ka leit sha u Paul Lyngdoh.
Ïa katei ka lympung la wan ban pynhap pyrda da u MLA ka Maw-kyrwat u Bah Renikton Lyngdoh Tongkhar kum u kongsan ha ryngkat ka jingdonlang u Bah Kyn-pham V. Kharlyngdoh kum u symbud kongsan, u Myntri Shnong Nonglang Bah Firsterlin Kha-raswai, Bah Syntarlin Snaitang, President Nonglang SC, Bah Kordorlin Kharlyngdoh, Secretary Nonglang SC, ki riew rangbah bad kiwei kiwei.
