Shillong, Jymmang 23
Ka Meghalaya Football Association (MFA) kan plie lad na ka bynta ki kynthei kiba don ïa ka sap ïalehkai phutbol da kaba kan pynlong ïa ka Women’s Meghalaya State League mynta u snem.
Kane ka lympung kan syriem kum ka lympung ïalehkai jong ki shynrang ha kaba baroh ki kynhun kiba khur nam lahduh na baroh ki district kin ïoh ban ïashim bynta.
Haba pynpaw ha ki lad pathai khubor ha ka sngi Palei, u General Secretary ka Shillong Sports Association u Bah Dipshon Lyngdoh Nongbri u la ong, “Kane ka lympung ïalehkai kaba thymmai kan long kaba ïasyriem bad ka Meghalaya State League jong ki shynrang, ha kaba ki kynhun kiba tbit jong ki kynthei na baroh ki distrik ba ïasoh lang na ka bynta ban ïaknieh ïa ka nam lahduh.”
Na ka bynta mynta u snem ïa ka SSA yn mihkhmat da ki kynhun nongjop jong ka Women’s Football League 2024, kata ka Laitkor bad ka PFR Academy kaba la wan ba-ar.
U Bah Nongbri u la ong ba ka long kaba sngew sarong ïa ka SSA ba bun ki nongïalehkai na ka Women’s Football League ki don mynta ban ïalehkai ha kylleng jong ka ri kum ha ka Garhwal United kaba la jop ïa ka nam lahduh jong ka Indian Women’s League 2 ha kine ki khyndiat sngi ba la lah.
Ka jingdon ïa kane ka lympung ha ka Jylla kan plie lad ïa ki klob na kane ka jylla Meghalaya ban ïalehkai ha ka IWL 2. Wat lada ka Jylla ka la pdiang ïa ka kylla khatduh (final round) jong ka IWL ha u snem 2017-18, hynrei ym pat don kano-kano ka klob ka ban ïoh ïalehkai ha katei ka lympung.
Ha ka aïom ïalehkai 2016-17, ka Royal Wahingdoh ka la shah khot ban ïashim bynta ha ka qualifier; hynrei kam shym la lah ban jam sha ka jingïakhun kaba kongsan hadien ba ka la shah rem ha baroh saw tylli ki jingïalehkai.
