Shillong, Jymmang 23
Ki pulit ka Ri-Bhoi ki la lap ïa ka metïap jong uwei u rangbah na ka paiñkhana jong kawei ka jaka theh umphniang kaba don hapoh ka distrik.
Katkum ka kyrwoh ba la phah da u Sr. Superintendent of Police, Ri Bhoi District, la pyntip ba ha ka 22 tarik Jymmang 2023 ha ka por 5:38 janmiet la ïoh jingtip ba uwei u briew u bym lah ban tip u dei uei, u la set ïalade hapoh ka paiñkhana jong ka Meera Petrol Pump, Norbong, Ri-Bhoi District.
Hadien kata, haba la plie pynpait ïa ka jingkhang, la lap ïa utei u briew uba la thiah lyngktar khlem tip briew shuh bad u bat artad ïa u thyrnia injek ha ka kti kamon jong u bad mar-mar hi la pynkynriah noh ïa u sha Byrnihat PHC ban ïoh jingïarap, hynrei mar ïa poi ha hospital, u doktor u la pynbna ba u la khlad lypa shuwa ban poi ha hospital.
Hadien ba la pyndep ïa baroh ki jingdonkam katkum ka aiñ, ïa ka met la pynkynriah noh sha Civil Hospital, Nongpoh na ka bynta ban leh ïa ka ‘Post Mortem’ bad la buh ïa ka ha ‘Morgue’ jong ka Civil Hospital.
Une u briew uba la khlad u don ïa ka jingjrong kaba kumba 5.5 ft, ka rta hapdeng 30-35 snem, dum rong ka sniehdoh bad u phong ka patlun ‘jeans’ rong jngum, ka ‘T-shirt’ rong saw blad bad jingdro ‘tattoo’ ha ka kti ka diang.
