Shillong, Jymmang 23
Ka Voice of the People Party (VPP) Youth Wing ha ka Sngi Thohdieng ka la phah jingthoh sha u Symbud Myntri Rangbah ka Jylla, Bah Prestone Tynsong ban tuklar halor ka jingdawa jong ka seng Meghalaya Commercial Truck Owners & Drivers Association (MCTODA).
Katkum ka kyrwoh khubor ba la phah da u Bah Marbud Dkhar uba dei President ka VPP Youth Wing u la ïathuh ba katkum ka jingaibor u President ka VPP Bah Ardent M Basaïawmoit ban leit ïakynduh ïa u Bah Prestone halor kane ka jingeh jong ki nongñiah trok, kumta u la phone ïa u nongtrei jong u Bah Prestone Tynsong ha Secretariat ba ki kwah ban ïakynduh hynrei kim shym la ïoh lad namar ba u Bah Prestone u don mynta sha Delhi.
U la ïathuh halor ka jingïakhih ka seng MCT-ODA ha Mawryngkneng, wat u President ka VPP Bah Ardent Basaïawmoit bad u MLA ka Mawryngkneng Bah Heaving Kharpran ki la leit ban ai jingkyrshan.
Shuh shuh, u la pyntip ba ka seng mynta ka sngi ka la pynher ïa ka shithi sha ophis u Bah Prestone ban kyrpad tuklar lem halor ka jingdawa ka MCTODA ban pynkiew noh ka dor bai kit bad bai kali na ki karkhana saiñ dewïong kiba don ha East Jaiñtia Hills District.
U la kyntu ïa ka sorkar ba ka dei ban tuklar lem da kaba peit ïa ka bha ka miat jong ki nongñiah trok ba ki dei ban long khuid ba kin ïoh kam ki trai shnong.
Ha ka juh ka por ka VPP Youth Wing ka kyrshan ïa kane ka jingïakhih jong ka MCTODA haduh ban da urlong ka jingdawa.
