Nongstoiñ, Jymmang 23
Ha ka Sngi Thohdieng jong ka taïew hadien ka jingud jingnam jong ki paidbah nongshong shnong namar ka jingjot rathai jong ka surok na Nongstoiñ sha Mawkawah khamtam ka bynta ha ka shnong Upper New Nongstoiñ, u MLA ka Nongstoiñ, u Bah Gabriel Wahlang ha ryngkat ki nongïalam shnong lem bad ki ophisar ka tnad PWD ki la pynlong ïa ka jingleit jurip ïa katei ka surok.
Katei ka jingleit jurip jong u MLA ka long shi bynta ban pyntip sha ki nongïalam ka shnong Upper New Nongstoiñ ba na ka liang jong u MLA u la dep ban shimkhia ïa katei ka jingeh jong ki paidbah ha kaba ka Sorkar lyngba ka ophis ba dei peit ka la mang pisa haduh T.90 lak 86 hajar 7 spah tyngka na ka bynta ban pynbha ïa katei ka surok.
U Sordar ka shnong Upper New Nongstoiñ, Bah J. K. Diengdoh u la pynpaw ka jingkmen halor ka jingshimkhia jong u MLA uba la pynurlong ïa ka jingangnud jong ki paidbah nongshong shnong da kaba wanrah ïa ki projek kam pynroi kiba ai jingmyntoi ïa ki paidbah ka Konstitwensi baroh kawei.
Ha kane ka juh kane ka sngi, nalor ka jingkieng kaba la thmu ban shna ha Wah Phodthre naduh u snem 2002 kaba la sahkut bad sahteng tang da uwei u païa ha kaba mynta la kumba 23 snem, ka la shu sahkut khlem da urlong, hynrei mynta katei ka jingkieng kan sa urlong noh hadien ka jingshimkhia jong u MLA ka Nongstoiñ.
Shuh shuh ïa katei la lah ban pyntikna da u MLA ha ka jingleit jurip ha katei ka sngi ha ryngkat ki ophisar ka tnad PWD lem bad ki nongïalam shnong jong ar tylli ki shnong, kita ka Tiehsaw bad ka shnong Upper New Nongstoiñ kiba katei ka jingkieng kan sa pynïasoh.
U Bah Gabriel Wahlang u la ïathuh ba ïa katei ka jingkieng kaba don 21.7 m la dep ban mang pisa haduh T.5 klur 77 lak 63 hajar tyngka bad shen yn sa sdang noh ban pyntrei ïa katei ka jingkieng kumjuh ban shna pynbha ïa ka surok kaba pynïasoh ïa kitei ar tylli ki shnong.
