Nongstoiñ, Jymmang 23
Ka kynhun ïalehkai jong ka Eh Rngiew F.T ka la ïoh ban rah ïa ka nam lahduh ha ka lympung ïalehkai Open To All Knockout Football Tournament 2024-25 ba la pynlong da ka New Nongstoiñ Sports Social & Cultural Club (NNSSCC).
Kane ka nam tam ka la wan hadien ba ka la pynliem noh ïa ka Mynjurlang F.T da 2-0 kol ha ka jingïalehkai final kaba la long ha ka sngi Thohdieng ha madan New Nongstoiñ. Kane ka la wan urlong lyngba u Babysunday Marngar bad u Nickson Bina.
Kane ka jingïakhun la ong ba ka long kaba ïakhaid bha ha kaba baroh ar kynhun ki la pyrshang ban ïakhun tyngeh, hynrei ka Eh Rngiew ka la ïoh ban pynkhihjar tang mar ïasdang ka jingïalehkai lyngba u Babysunday Marngar ha ka minit kaba 8.
Hapdeng kane ka jingïakhun kaba itynnad, ka Mynjurlang kam shym la lah ban pynphai wat tang shi kol ruh haduh kaba kut jong ka kylla step. Hadien ba la bteng ïa ka jingïakhun jong ka kylla miet, baroh ar kynhun ki la ïai bteng ban ïakhun tyngeh hynrei kim shym la lah ban thep. Ha shwa ban wai ka Eh Rngiew ka la thep biang sa shi kol lyngba u Nickson Bina ha ka minit kaba 90+3 na ka bynta ban jop shisyndon.
Lyngba kane ka nam jop ka Eh Rngiew ka la ïohpdiang ïa ka song pisa kaba T. 5 lak tyngka ryngkat ka trophy, katba ka Mynjurlang ka la ïoh T. 3 lak tyngka ryngkat ka trophy ba la sam da u MLA ka Nongstoiñ u Bah Gabriel Wahlang. Ïa ka nam ‘Man of the Match’ la ïohpdiang da u Atlanson Kharmaw na ka Eh Rngiew FC.
Ha kane ka sngi nalor u kongsan, la donlang ruh u Sordar ka Shnong New Nongstoiñ, Bah Sraly Rashir uba long ruh kum MDC ka Mawshynrut, u President ka NDSA, Bah B.S Kharlor, ki nongkitkam ka New Nongstoiñ Sports Social & Cultural Club, ki ‘riew rangbah bad kiwei kiwei.
