Shillong, Jymmang 23
Ki nongtrei Muster roll kiba don hapoh ka Mawphlang PHE Electrical Division ki la pynpaw ba ki la mad biang sa kawei pat ka jingshah leh beiñ kata ka dei halor ka jingshah ot tulop kaba 3 sngi na ka 31 sngi.
Kitei ki nongtrei ki la pynpaw ba kane ka jingleh jong ki bor ba dei peit ïa kane ka tnat kaba don ha Mawphlang ka la ktah shikat dei eh ïa ki nongtrei Muster roll kiba don ha kane ka tnat treikam bad ong ba mynta ka la don ar bnai shiteng ba ki la shu ap hi dngong ban ïoh ïa la ka bainong na u soh jong ka jingtrei shitom hynrei phewse, ynda ki la ïoh ïa ka bainong ki la ïohi pynban ba ki la shah ot haduh lai sngi.
“Kum ban shu phai khyndiat shadien ba kham mynshwa ha ka por u (L) Bah SK Sun uba dei u Engineer bad Chief Engineer barim kane ka tnat ym ju don koit kaba kum kane ka jingshah ot tulop, hynrei kynsan mynta ka la mih kane ka jingshah ot tulop ki nongtrei”, ong kitei ki nongtrei Muster roll.
Kitei ki nongtrei Muster Roll ki la pynpaw ïa ka jingsngew lyngngoh kaba khraw halor kane kaba la buh ïa ki hapdeng ka umdum bad u dak jingkylli uba heh.
“Na ka liang ki nongtrei Muster Roll ngi pynpaw ïa ka jinglyngngoh kaba khraw bad kylli ruh na kaei ka daw namarba ngi ju wan trei beit manla ka sngi. Kumno yn shu ot tulop na ngi? Ngim tuklar ïa ka jingthep kam thep jam bathymmai jong ki hynrei ngi kwah ban ïoh tang ïa kaba ngi dei hok ban ïoh namar ka umsyep jong ngi kaba ngi la pynjaw kam dei ban jaw bakla shawei pat, hynrei lada ka long da kumwei pat, kata ka umsyep jong ngi kan sa trei la ka jong ka kamram ha kita kiba ibeiñ ïa ngi ki rit ki ria”, ong ki nongtrei Muster roll.
Shuh-shuh, kitei ki nongtrei Muster Roll ki la pynpaw ba kane ka la ktah shikat dei eh ïa ki kum ki nongtrei kiba trei bad bylla tang nangne na PHE Mawphlang khlem da don pat ïa kiwei ki kam shawei.
“Kiba donbor ki ïoh ïa ka tulop manla u bnai bad kata ruh ha ka dor kaba heh bad kaba palat arphew lane shiphew shah ïa kaba ngi ïoh hynrei ngi pat nalor ba ngi slem ban ïoh ïa ka tulop hynrei ngi shah ot pat sa kumne. Hato u paidbah u hun sieh ban shu khñium na ïing khlem da pynsngew lem ïa kane ka jingeh?,” ong kite ki nongtrei Muster roll.
Ki la ong ba lada kane ka ïai jia sah kumne na ka por sha ka por, kim banse ban phah tuklar noh ha ki bor ba halor kane ka jingshah khñiot beiñ jong ki kum ki nongtrei Muster roll.
“Lada ka ïai long sah ha kane ka rukom, ngim banse ban phah tuklar lem ha ki bor ba halor kane ka jingshah khñiot beiñ jong ngi kum ki nongtrei Muster roll hangne ha Mawphlang PHE Electrical Division. Ngim dei ki biej ban shu kohnguh ne ban shu khñium sah nala ïing, ngi don ka jingnang jingstad kaba ngi tip ïa kaei kaba dei bad kaei ka bym dei kumno ban leh ïaka”, bynrap kitei ki nongtrei Muster roll.
