Washington, Jymmang:
Uwei u briew uba la shah kynnoh ba u la siat iap ia 2 ngut ki nongtrei jong ka tnat Embassy ka Israel, shabar jong ka jaka buh jingthoh jong ki Jiw ha Washington, u la shah pynngat kyndon ha ka Sngi Thohdieng hapoh ka kyndon pynkheiñ aiñ jong ka jingpyniap briew, namar ka jingiakynad ha ka pyrthei halor ka jingpyrshah ia ki Jiw ha katei ka jingshah thombor.
U Elias Rodriguez, 30 snem ka rta, la ong ba u la pyrta ia ka kyntien “Free Palestine” katba u dang shah kem bad shah rah noh ha ki pulit hadien katei ka jingjia ha ka janmiet jong ka Sngi Balang shabar jong ka Capital Jewish Museum.
Haba la tohkit bad kylli da ki heh pulit, utei u briew u la ong ba u leh ia kane na ka bynta ka Palestine bad ka Gaza.
Utei u briew u dei u nong Chicago bad u la shah pynieng nyngkong hakhmat iingbishar ha ka Sngi Balang hadien pat la pynngat ia u ar tylli ki kyndon, kiba ia dei bad ka jingpyniap briew kaba nyngkong bad ka jingpyniap ia ki heh sorkar bar ri. Lada shah rai pynrem, u lah ruh ban shah rai pyniap noh shisyndon namar katei ka jingpynkheiñ aiñ jong u.
Ki bor synshar ki dang tohkit ïa kane ka jingjia synreit kuli, naba ki ong ruh ba kane ka jingjia ka la iaryngkat bad ki kam thombor jong ki lehnoh pyrshah ia ki ‘riew paidbah bad ki mynsiem ba lui-lui.
