Agartala, Jymmang:
Ki pulit ka Tripura ryngkat ka jingïarap na ki trai shnong ka thaiñ, ha ka sngi Palei ki la kem ïa 5ngut ki nongshong shnong jong ka ri Bangladesh na ka thaiñ khappud Pathariyadar kaba hap hapoh jong ka Madhupur Police Station ha Sepahijala distrik jong ka Tripura.
Napdeng kine kiba la shah kem ki don arngut ki kynthei bad lai ngut ki shynrang kiba hadien la rah sha Madhupur Police Station ban tohkit.
Ha ka jingtohkit kaba hashwa, kine ki briew ki la kam ba ki la jam ïa u pud u sam da ka jingthmu ban poi sha Delhi na ka bynta ka jingleit wad kam. Ki la pynpaw ba ka kynhun ki nongkhaïi briew na Bangladesh ki la ïarap ïa ki bad wanrah ïa ki sha ka liang jong ka India lyngba ka thliew kaba don hapoh ka jingker nar hajan Pathariyadar.
Katkum ka jingïathuh jong kitei kiba shah kem, kitei ki nongkhaïi ki la shim ïa ka pisa Bangladeshi kaba 15 hajar Taka bad kawei ka mobile phone na ki shwa ba kin phet krad. Ki nongkhaii ki la bthah ïa ki ban jam sha ka liang India lyngba ka nala krem.
La ïathuh ba katei ka kynhun ka la phet krad na ki BSF bad rung shapoh ka jaka jong ka ri India, da kaba ïaid kai kylleng ka miet. Ha ka step jong ka sngi Palei, ki nongshong shnong jong katei ka jaka ki la ïohi ïa ki ba ki ïaid kai da kaba suba ha katei ka jaka. Ki nongshong shnong ki la pyntip sha ki pulit, kiba la kem ïa ki.
Ha ka jingtohkit ba nyngkong la lap ba baroh 5 ngut ki briew ki dei na kajuh ka longïing na Kurigram distrik ha Rangpur Division, Bangladesh. Ki pulit ki la ithuh ïa kine kiba la shah kem kum u Monir Khan, ka kurim jong u ka Saheba Khatun, ki khun shynrang jong ki u Shahjalal Khan bad ka Swadhin Khan, bad ka pyrsa kurim ka Dulali Khatun.
Ki jinglap ba nyngkong ki pyni ïa ka jingdonkti jong ki kynhun khaïi briew na Bangladesh, bad ki tyllong khubor ki pyni ba ki don ki nongïarap trai ri na ka liang ka ri India ruh kiba lah ban ïashim bynta ha kane ka kam.
