Shillong, Jymmang 23
U coach ka Real Madrid, Carlo Ancelotti, u la ai khublei shwa ïa ka jingïalehkai final jong ka kynhun jong u, da kaba pynpaw ïa ka kitbok-kitrwiang ïa u nongmih bujli, u Xabi Alonso, shwa ba un leit shimti ïa ka kynhun ïalehkai jong ka Brazil.
Ha ka jingïalang bad ki nongthoh khubor ha Madrid ha ka sngi Thoh-dieng, u Ancelotti u la kren shaphang ka jingleit noh jong u hadien hynriew tylli ki samoi ïalehkai kiba u la don bynta ban khur haduh 15 tylli trophy na ka bynta katei ka klob.
U coach jong ka Bayer Leverkusen, u Alonso, uba la jop ïa ka Bundes-liga bad German Cup ha u snem 2024, u la thmu ban shimti ïa ka kam ha Real Madrid, ha shwa ka Club World Cup, wat la ka klob kam pat pynbna satia ïa ka jingthung kam na ka bynta jong u.
U Ancelotti u la kren shaphang ka kam kaba dang wan jong u nongmih bujli jong u ha ka jingïalang bad ki nongthoh khubor, da kaba ong, “Ngam kwah ban ai jingmut namar baroh ki don la ka jong ka jong ka jingmut shaphang ka phutbol. U Xabi u dei uba nyngkong (ban wan hadien jong nga), nga kitbok kitrwiang na ka bynta jong u, namar u dei u coach uba don ïa ki jinglong ban hikai ïa kane ka klob bad ka kynhun.”
Une u coach na Italy uba la 65 snem ka rta u la kubur ïa ka jingsngew kyndeh na ka bynta katei ka jingïalehkai final kaba un pynïaid khatduh ha Santiago Bernabeu pyrshah ïa ka Real Sociedad jong ka lympung La Liga.
“Nga don ïa ka ha ka jinglong tynrai jong nga ba nga sngew kloi bha, namar ba u kpa tymmen jong nga u la leh kumta, bad u kpa jong nga ruh kumjuh, kumta kan dei ka sngi kaba sngewkhia bha lashai”, la ong u Ancelotti.
“Ngam don jingeh lada nga kut noh ha kaba ïam, ngam don jingeh satia, ngan ym buhrieh ïa ka ha kata ka jingmut. Kan long ka sngi kaba phyrnai ha ka jingim jong nga.”
Kane ka jingïakhun kan dei ruh kaba khatduh na ka bynta u rangïalehkai shapdeng u Luka Modric ha Santiago Bernabeu, ha kaba une u rangïalehkai ka Croatia un sa mih noh hadien ka Club World Cup ha America.
U Ancelotti u la thoh ha ka rynsan social media da kaba pynpaw ïa ka jingsngewnguh jong u, da kaba ong, “Nga rah ha la ka dohnud ïa manla ka khyllipmat ba nga la mad ha kane ka jingïalehkai kaba ar kaba phylla kum u nonghikai ka Real Madrid. Ki la long ki snem ki bym lah ban klet, ka jingleit kaba phylla kaba dap da ki jingsngew, ki khusnam bad, halor jong baroh, ka jingsarong ban mihkhmat ïa kane ka klob. Ka jingïadei jong nga bad ka Real Madrid ka long kaba neh junom.”
Ha kawei pat ka liang ka Brazil ka la pynbna ar taïew mynshwa ba utei u coach na Italy un shimti ïa ka kynhun ïalehkai jong kane ka ri naduh mynta ka lyiur, shisnem shwa ba ka jingïateh kular jong u bad ka Real Madrid kan poi sha kaba kut.
