Nongstoiñ, Jymmang 25
Ka Federation of Khasi Jaiñtia & Garo People (FKJGP) Rambrai Circle ha ka 24 tarik mynta u bnai ha ka jingjurip ïa ka ïew Rambrai, ka la lap ba la syrtap da ki ñiut ki ñier bad jakhlia ha kiba bun ki bynta jong kane ka ïew.
Kane ka jinghiar jurip jong ka FKJGP ka la long hadien ka jingud jingnam jong ki paidbah, ha kaba la ong ba ka seng ka la lap ba kane ka ïew kaba dei kawei na ki pliang ja jong ki nongshong shnong ka la syrtap sa tang da ki jakhlia suda.
U President ka FKJGP Rambrai, Bah Jitstarlan Lyngkhoi u la ong ba ka seng ka pynpaw ïa ka jingsngewkhia kaba jur halor kane ka bynta, ha kaba kat ka Hima Rambrai kam don wat tang ka jaka bret ñiut, da kaba u la bynrap da kaba ong, “Imat ka dei ka jingbym shimkhia jong u Syiem bad ka executive committee jong ka”.
U Bah Jitstarlan u la ong ruh ba ka seng kan sa leit ban ai ka jingujor ha u Deputy Commissioner jong ka West Khasi Hills District ban phah tuklar lem halor katei ka bynta, bad ha kajuh ka por ka seng ka pynrem jur ïa kane namar ba kum u Syiem uba dei u khlieh jong ka Hima u dei ruh ban tip ïa ka bynta ka khuid ka suba.
U Bah Maian Nongphud, Sordar shnong ïew Rambrai pat u la pynpaw da kaba ong, “Haba nga ïohi ïa kane ka jingjakhlia, na ka liang jong nga bad ki nongshong shnong ki dap da ka jingsngewkhia namar ka dei kawei ka bynta kaba la pynkheiñ ïa ka aiñ jong ka koit ka khiah.”
U la ong ruh ba ka shnong ka kyntu ïa ki bor ba halor ba lada long kaba lah ha ka jingïatreilang jong ki nongshong shnong, ïa kane ka jakhlia kiba la don hangne yn thaw ïa ki lad ki lynti ban pynkynriah noh ha kawei pat ka jaka.
U la ong ruh ba na ka por sha ka por ka shnong ka la kyntu ïa u Syiem ba ïa kane ka jakhlia kaba don hangne dei ban leit bret noh sha kawei pat ka jaka hynrei kaba sngewsih ka long ba na ka liang u Syiem u pyntip ba ym pat ïoh ïa ka jaka, te kum ka shnong da ka jingïatreilang jong ka shnong, ka Hima bad kiwei pat ki bor ba halor la kumno-kumno dei ban thaw noh ïa ki lad ki lynti ban lah ban weng noh ïa katei ka jakhlia.
“Ngi ïohi ba lada ngin shuh iehnoh hangne khamtam ha ka por tlang kaba don ïa ka lyer kaba beh, ki plastik kiba don hangne ki lah ban poi sha ki thliew ïing jong ki nongshong shnong bad kane ka long kaei re kaei kaba ktah ïa ka koit ka khiah jong ki nongshong shnong khamtam ïa ki longïing kiba don hajan jong kine ki ñiut,” ong u Bah Nongphud.
