Nongstoiñ, Jymmang 25
Ka Hynñiewtrep Youths’ Council (HYC) West Khasi Hills ha ka 24 tarik mynta u bnai hapoh ka jingïalam u samla Lumlang Kharsyiemlieh, President bad kiwei ki nongkitkam ka la hiar ban khynra ïa ki bar jylla lyngba ka Sier Lapalang Operation.
Ha ka khubor ba la phah da ki nongïalam ka HYC West Khasi Hills la ïathuh ba katei ka jingleit khynra, la hiar ha ka shnong Umjaru ha West Khasi Hills kaba don ka karkhana thymmai jong ka MD Ferro Alloy.
Shuh shuh ki nongïalam ka HYC ki la pynpaw ruh ba katkum ka jingong jong u Manager In-charge katei ka karkhana, la ong ba ka la dep ïoh NOC naduh na ka shnong, ka hima, ka KHADC bad na ka Meghalaya Pollution Control Board.
Ki nongkitkam ka HYC ki la ong ruh ba ha katei ka jingkhynra, ka HYC ka lap kumba sanphew saw ngut ki bar jylla ki don ha katei ka karkhana bad bun ki nongtrei ki la don ïa ki Labour License.
Shuh shuh ki la ong ruh ba ka seng lyngba ka Sier Lapalang Operation ka kren shai ba ki bar jylla ki dei ban pynbiang ïa ki kot ki sla, bad ki bym biang ka HYC kan pynphai beit ïa ki, namar ka Sorkar lyngba ka Meghalaya Identification Registration Safety and Security of Migrant Workers Rules 2020 ka kren shai kam shah ban wan trei khlem kot khlem sla.
“Ka seng ka ïohi ba ka Sorkar kan pyrkhing bha ïa ka rung ka mih na Bangladesh namar ïoh lehse kin wan buhai. Kumta ngi hap peit pyrman bha namar kan buh jingeh ïa ka jaidbynriew lada ngim peit bha,” ong ka HYC.
Nangta, ki nongïalam ka HYC ki la ong ruh ba “Ka seng ka kren shai ban shaniah tang ïa ka Aadhaar bad sa ai noh labour license kan long kaba ma ïa ka jaidbynriew namar kaba suk ban shna tuh ïa ka Aadhaar ha kane ka juk da ki bar jylla, ka Sorkar ka dei ban shimkhia ban lait na ki jingma khamtam ka Police Verification ka donkam eh.”
Ki la ong ruh ba ka seng kan nang ïai pynkhlaiñ ïa ka Sier Lapalang Operation kum shi bynta ban dawa na ka Sorkar ban pyntreikam noh ïa ka Inner Line Permit.
