Nongstoiñ, Jymmang 25
Uwei u heprit na ka shnong Nongrangoi ha West Khasi Hills District u la lait im na ka jingngam jyllop ha kawei na ki thliew paiñkhana kaba la dap um jong ki para marjan kaba jylliew kumba phra phut eiei.
Katkum ka khubor la ïathuh ba ïa utei u heprit uba la lait im na katei ka jingjia la tip kyrteng u Saibanstar Syiem, 6 snem ka rta bad katei ka jingjia ka la jia ha ka 22 tarik u bnai Jymmang 2025 ha ka por shiteng sngi, hynrei donbok ba kawei ka khynnah kaba la tip kyrteng kum ka Larikordor Syiem kaba dang 12 snem ka rta, ka khun jong u Bah Diningstar Kharbani bad ka Kong Phullinda Syiem kiba shong ba sah ha ka shnong Nongrangoi (Umyiap) ka la pyllait im ïa utei u heprit uba dei ruh u para arkmie jong ka.
Ha ka jingïakren bad ki kmie ki kpa, ki la ong ba ha katei ka sngi namar ba ki dei nongrep ki la hap ban leit sha ki jaka rep hynrei ki la ki ieh noh tang ïa ki khun ha ïing.
Utei u heprit uba la lait im na ka jingngam jyllop ha ka thliew paiñkhana u la ong ba ha katei ka por ma u bad u para arkmie uba dang kham rit ki la leit sha ka ïing jong ki para marjan ban leit kheit sohphie hynrei kim ai, kumta ki shu leit khar noh ïa kiba hap ha madan bad ha ka por ba ki mut ban wan phai noh u la btuit bad ka slipar ka la hap ha katei ka thliew kaba dap da ka um palat ïa ka mar shiteng.
U la ïathuh ruh ba u la shim da u dieng uba rit ban woh ïa ka slipar bad u la hap shapoh.
U para uba kham rit pat u la ong ba ha ka por ba u la hap hapoh um, u ngam u per u ngam u per bad u rah ïa ki kti bad u la shim da uwei u siej ban phah snoh ba un ïoh tan shabar hynrei namar ka jinglyngkot palat u siej um shym la ïoh. Kumta u la mareh ban leit khot ïa ki hynmen ban ïarap bad ka hynmen arkmie.
Shuh shuh, la ong ruh ba katei ka hynmen ka la mareh wut-wut sha katei ka jaka bad haba ka la poi ka la pajut na ka kti bad ïoh sei shabar bad haba ka la ïoh ban tan shabar ka la khem ïa ka met na shadien bad khñiot ïa ka kpoh bad shadem bad ka um ka la mih na shyntur bad thliew khmut bad hadien katto katne utei u para jong ka, u la tip briew bad ka la ïalam noh sha ïing.
