Shillong, Jymmang 25
Wat la bun ki tip bha shaphang u Thomas Jones uba la pynsah-nam ïalade kum u kpa ki dak thoh ha ka ktien Khasi hynrei ki don ruh ki khana bynrap kiba u la leh mynba u dang ïaid ha kine ki lum Khasi kiba ym paw bha wat ha ki jingthoh ruh.
U Thomas Jones u la poi ha Sohra bad la ka kurim, ka Anne Jones ha ka 22 tarik u Jylliew, 1841. Kum u mishoneri hadien shi snem ha katei ka jaka u la pynwan-dur ïa u dak A, B, K, D ter ter haduh Y- ki dak kiba la pyndonkam ha ka thoh ka tar u Khasi kat haduh mynta.
Ha ka 23 tarik u Jymmang, 2025, ha ka jingïalang plie mawnongrim na ka bynta ban pynbit pynbiang ïa ki jaka jngohkai ha Laitlum bad shnong Mawber da u Bah Paul Lyngdoh, Myntri ba dei khmih ïa ka tnat kam jngohkai ha ryngkat u Bah Banteidor Lyngdoh, MLA ka Mawkynrew Konstitwensi, la mih ka jingpyntip ba u Thomas Jones u la wan sah ha Mawber ha u snem 1847 kata shwa ba un phet sha Calcutta bad khlad pat ha u snem 1849.
Kane ka jingbuh mawnongrim ha ka jingïalang ha Laitlum ka long ban sdang noh ïa ki projek ban kyntiew kam jngohkai ha kine ki ar tylli ki shnong kata ha Laitlum ban shna ïa ki jingker riat ha ka mang tyngka ba 97 lak bad ki jingshna ban kyntiew kam jngohkai ha Mawber ha ka mang tyngka ba 29.97 lak.
Ha ka jingïalang la ïadonlang da ki ophisar ka tnat Tourism, PWD (Roads), ki nongïalam shnong lem kiwei pat. La pynshongshit shong shngaiñ ïa ka jingïalang da ki jingrwai bad ki jingshad na ki khynnah skul bapher bapher ka shnong Laitlum.
U Bah Paul haba kren ha ka jingïalang u la ong ba ka tnat kan pynkylla ‘Heritage Site’ ïa ka shnong Mawber khnang ba ka pyrthei baroh kawei kan tip ïa ka bynta jingïadei jong ka bad u Rev. Thomas Jones.
U la ong, ki projek ban kyntiew ïa ka kam jngohkai kiba dang ïaid ha kane konstitwensi ki long ha Nongjrong ha kaba la dep ban bei tyngka haduh 5 klur, ha Mawlyngot ïa kaba la mang 8 klur tyngka bad kawei pat kaba dang wad jaka ha Jongksha kumba 23 akar.
Na ka liang u Bah Banteidor u la pynpaw ba ki kam ban kyntiew ïa ka roi ka par bad ka ïoh ka kot ha ka konstitwensi ka dei borabor da ka jingïatreilang kata naduh ki surok, ka um bam, ka koit ka khiah, ki kam jngohkai bad kiwei pat.
Hadien kane prokram buh mawnongrim na Laitlum, u Bah Paul ryngkat u Bah Banteidor ki la pynlong ka jingjurip ïa ki jingtrei kiba dang ïaid shakhmat ha ka shnong Nongjrong kaba dei kawei na ki jaka ba khring bha ïa ki nongwan jngohkai pyrthei.
