Shillong, Jymmang 25
U Symbud Myntri Rang-bah ka Jylla, Bah Prestone Tynsong u la kynmaw ba haduh khatsan sien ba u la ïohi ba ka Khasi Students’ Union (KSU) Delhi Unit ka la ïoh ban pyllait im ïa ki samla kiba wan wad kam haba ki shah thok ynda ki la poi sha Delhi.
Ïa kine ki kyntien u la kren kum u kongsan ha ka jingïalang ban pynlong ïa ka Mr. bad Mrs. Hynñiewtrep 2025 kaba la long ha ka 24 tarik Jymmang 2025 ha Meghalaya House Dr. APJ Abdul Kalam Road New Delhi ha ka jingïadonlang u MP Lok Sabha ka Tura u Saleng Sangma, Bah Wailad-miki Shylla, MLA ka Jowai konstitwensi, Bah Daniel Thangkhiew, Bah Lambokstarwell Marngar kum President ka KSU Sengkmie.
U Bah Prestone u la wer ïa ki briew kiba sah ha Delhi ba kin wan kai sha Meghalaya, ban ïoh ïa ka lyer kaba khuid kaba ym donkam ïa ka lyer ba shu shna hynrei ban ïoh ïa ka lyer na ka jingitynnad ka mariang.
Na ka liang u Bah Lambokstarwell Marngar u la ong ba ka ri Khasi ka long shisha kaba kyrpang lada ïanujor bad ha Delhi namar ka dei ka ri kaba biang naduh ka mariang ban ring mynsiem da ka lyer kaba khuid, ka jingdon ka jingngeit, ka jingriewspah ha ka riti dustur.
“Ngi duna ha ka jingbun briew hynrei ngi la sdang ban kiew ha baroh ki liang, kumta ngi dei ban sngew sarong ïa ki longshwa manshwa kiba la sumar bad pynneh pynsah ïa ka jaidbynriew,” u la ong.
U la ong ha kane ka juk baroh ki ïabeh ïa ka jingnang jingstad hynrei u sheptieng pat ïoh tyllep noh ïa ka saiñpyrkhat kaba thymmai ïa ka jaidbynriew.
Shuh shuh, u la pynkynmaw ba la seng ïa ka KSU Delhi Unit ha u snem 2014 da ka jingïapyrkhat ban lum ban lang ïa ki samla kiba sah ha Delhi bad la ïoh ban pynkha shnat sha Dehradun, Bangalore bad kiwei de ki jylla ha shatei mihngi.
U la pynpaw ka jingsngewkhia namar ka jingkyrduh kam hapoh ka jylla haba ki samla ki hap ban mih napoh ka jylla ban wad kam sha Delhi hynrei ki shah ïalam bakla. Kumta u la kyntu ïa ki kmie ki kpa ban ai ka jingïatreilang bad ka KSU Delhi Unit.
Na ka liang ka samla Marbiang Khongwir kaba dei ka President ka KSU Delhi Unit ka la ai khublei ïa baroh kiba wan ïashim bynta ha kane ka prokram.
