Shillong, Jymmang 25
U Bah Paul Lyngdoh uba dei u Myntri ba khmih ïa ka tnat Kam Jngohkai ka Sorkar Jylla u la ong, “Ngi im ha ka juk ba khyllah bha ba ki briew ki kham ai burom, ki kham peit thuh, ki kham pynlong kongsan, ai jaka kham bun ïa ki briew ba kren shibun shibun, ki kren pyrta bad rwai, hynrei kaba khatduh ka shu kut ka nia shi kudam, ka kam shi kham.”
U Bah Paul u la kren ïa kitei ki kyntien ha ka jingïalang plie mawnongrim na ka bynta ban pynbit pynbiang ïa ki jaka jngohkai ha Laitlum bad shnong Mawber kaba la long ha ka 23 tarik mynta u bnai. Ha kane ka sngi la ïadon lang u MLA ka Mawkynrew Konsti-twensi u Bah Banteidor Lyngdoh nalor kiwei ki ophisar Sorkar.
U Bah Paul haba ai jingkren ha kane ka jingïalang u la ong, kane ka juk ka long kaba khyllah bha ha kaba ki briew ki kham ai burom, ki kham peit thuh, ki kham ai pynlong kongsan, ai jaka kham bun ïa ki briew ba kren shibun shibun, ki kren pyrta bad rwai, hynrei kaba khatduh ka shu kut ka nia shi kudam, ka kam shi kham. Pyrkhat hi ma phi ki paidbah, lada jied ïa ki briew ban leit sha ïingdorbar kaba nia shi kudam ka kam shi kham, hangne ha Laitlum yn leh kumno.”
“Ngi donkam ïa ki ‘riew trei. Phi jied ïa ngi ban trei da ka kam, da ki matti bad sngew sarong ban ong ba kum u nongïalam naduh ka por KSU ha u snem 1991, nga la shakri paidbah mynta la 34 snem, nga kren ha ki jingïalang ba bun bad nga pynbud pat da ka kam, ban pynthikna ba ka kam bad ka tyngam kin ïaid ryngkat-ryngkat, ngi donkam ïa kata,” la ong u Bah Paul.
Da kaba pynshongnia ba ka long donkam ban pynbun da ka kam ban ïa kaba heh tang ka ktien, u Bah Paul u la ong ba ka long khyllah bha pat ba ki briew ki kham ai burom bad pynlong kongsan ïa ki briew kiba kren shibun shibun.
U la ong ba ka kam bad ka tyngam ka dei ban ïaid ryngkat-ryngkat bad kdew hapdeng ka jingduk ka jingsahdien, ka pang ka jhia lada ki MLA bad MDC ki dei tang ki nongsam-nia te yn nym ïohi ïa ka roi ka par.
U la kynthah da kaba ong ba ki leit sha Ïewduh shu ïa khublei hynrei ka Sorkar haba ka leit ka rah ryngkat ka song pisa kaba 21 klur tyngka ban pynbit pynbiang ïa ki jingdonkam ha katei ka ïew.
“Ka Sorkar ka la theh haduh 21 klur tyngka ha Ïewduh, wat la kam dei ka ïew jong ka Sorkar hynrei ka ïew jong ka Hima Mylliem hapoh ka jingpeit jong ka KHADC. Hynrei namar ba katei ka ïew ka dei ka pliang ja jong u Khasi, ka daw ba sa pynlong ïa ka Sorkar jong ngi ban ai 21 klur, bad ban pynkylla dur ïa kane ka ïew,” la ong u Bah Paul.
