New Delhi, Jymmang 25 (UNI)
U Myntri Rangbahduh ka ri, Narendra Modi ha ka Sngi U Blei u la ong ba ka ‘Operation Sindoor’ kam dei tang ka kamram kaba la bynshet ha ki shipai hynrei ka pynpaw ruh ïa ka jingkut jingmut kaba skhem jong ka India, ka jingshlur bad ka mynsiem jong ka ri ha ka liang ka jingkylla.
Haba kren ha ka kylla kaba 122 jong ka jingkren ba man u bnai lyngba ka ‘Radio’ – ‘Mann ki Baat’, u Myntri Rangbahduh u la ong ba ka ‘Operation Sindoor’ ka la pynïatylli ïa ka ri ban ïeng pyrshah ïa ki kam lehnoh bad ban pynrung ha ka ri baroh kawei ïa ka jingsngew ieid ri kaba la pynthymmai.
“Mynta, ka ri baroh kawei ka ïatylli pyrshah ïa ki kam lehnoh, kaba dap da ka jingbitar bad ka jingkut jingmut. Uwei-pa-uwei u nong India u don ïa kajuh ka jingkut jingmut – ba dei ban pynduh jait ïa ki kam lehnoh,” u la ong.
Haba ai jingïaroh ïa ka jingshlur bad jinglong ba tikna jong ki shipai ka India, u Modi u la ong, “Ka jinglong ba tikna bad ba thik-pa-thik ha kaba ki shipai jong ngi ki la pynpra ïa ki jaka rieh jong ki lehnoh sha shiliang khappud ka long kaba phylla shisha.”
U la ban jur ba ka jingjop jong katei ka sienjam ka la kyntiew ïa ka jingshaniah ha ka pyrthei haba phai sha ka jingïakhun ka India pyrshah ïa ki kam lehnoh.
Haba pynpaw ïa ka bynta jong ka teknoloji bad ki tiar ba la shna hapoh ri ha kane ka jingtreikam, u Myntri Rangbahduh u la ong ba kane ka ‘Mission’ ka la pyni ïa ka bor jong ka ‘Atmanirbhar Bharat’.
“Kane ka jingjop ka pruid ïa ka dak jong ki enjiniar, ki ‘riewstad jong ngi, bad ka jingkhlaiñ jong ki tiar ïakhun bad ki rukom treikam ba la shna da ka India,” u la ong.
U Modi u la bynrap shuh-shuh ba kane ka jingïalap ka la wanrah ïa ka jingshit rhem ka bathymmai na bynta ka jingïakhih “Vocal for Local”. Da kaba kdew ïa ki jingjubab jong ki paidbah, u la ïasam kumno ki nongshong shnong ki kular ban kyrshan ïa ki mar India – naduh ka jingjied ïa ki tiar ïalehkai ba la shna ha India na bynta ki khun jong ki haduh ka jingleit shuti bad ka jingrakhe ïa ki jingkhawai shongkurim hapoh ri lajong.
U Modi u la ong, “Uwei u longkpa u la ong. Mynta ngin thied tang ïa ki tiar ïalehkai ba la shna ha India na bynta ki khun jong ngi. Ka jingieid ri kan sdang naduh dang rit. Don ki longïing kiba la shim ïa ka jingbam smai ba ngin pynlut ïa ka shuti kaba hadien jong ngi ha kano-kano ka jaka kaba itynnad ha ri lajong”.
“Bun ki samla ki la shim ïa ka jingkular ban shongkurim ha India… ba kin ïathoh shongkurim ha ka ri. Don ruh kiba ong, “Mynta kano-kano ka jingai sngewbha kaba ngin ai, yn shna da u nongshna tiar ka ri India,” la ong u Modi.
“Kane ka dei ka bor ba shisha jong ka India – ka jingïadei hapdeng ki briew bad ka bor pyrkhat. Ka jingïashim bynta paidbah ka dei ka bor jong ngi,” ong u Modi, da kaba kyntu ïa ki nongshong shnong ban buh hakhmat eh ïa ki mar ba la shna ha ri lajong kum ka sienjam ban tei ïa ka ri bad ka jingshaniah ha lade ha ka liang ka ïoh ka kot.
“To ngin shim ïa ka jingbam smai katba lah ha ka jingim jong ngi, ngin kham noh sha ki mar ba la shna ha India. Kane kam dei tang ka jingshaniah ha lade ha ka liang ka ïoh ka kot; ka dei ka jingnoh synñiang jong ngi sha ka jingkiew jong ka ri,” u la bynrap.
