Washington, Jymmang:
Ka sorkar jong u Trump ha ka Sngi Palei, ka la bthah ia ka Harvard University ba kam bit ban pdiang ne pynrung shuh ia ki khynnah pule ba nabar jong ka ri. Ki bor pyniaid jong ka US ki la ong ruh ba kin leh ia kane da kaba tohkit bniah ruh ia ki bor pyniaid katei ka skul bah lyngba ka Department of Home-land Security. Ia kane ka shithi la dep phah ruh sha katei ka skulbah da ka Secretary jong ka Homeland Security, ka Kristi Noem.
Ha ka jingkren paidbah jong ka hapoh ka rynsan ‘X’, ka Kristi ka la ong ruh ba katei ka jaka pule ka dei ka jaka kaba ju pynmih ia ki jingkulmar naduh ki jingiakynad, ki jingpyrshah jaitbynriew bad kiwei de ki kynrum-kynram kiba long ka jingma ia ka imlang-sahlang bad ka shongsuk- shongsaiñ hapoh katei ka nongbah.
Nalor kata, ka la ong ruh ba ka jingpyntam ia ka bai pule na ka bynta ki samla pule ba nabar ri ka iarap ban pyndap ia ki jingai pisa jong ki kiba bun klur tyngka.
Kane ka jingsynshar ka buh jing-kitkhlieh ia ka Harvard na ka bynta ban pynmih ia ka jingleh donbor, ka jingpyrshah ia ki Jiw, bad ka jingiatreilang bad ka seng Communist jong ka China ha ka jaka pule jong ka.
Namar la ong ba ka long tang ka kabu, ym ka hok, ia ki skulbah ban pynrung kyrteng ia ki samla pule nabar ri bad ban ioh jingmyntoi na ka jingsiew bai skul jongki kaba kham heh.
Hynrei, ha ka shithi ba la phah sha ka skulbah Harvard, la kdew ba, lada ka Harvard ka kwah ïa ka lad ban ïoh biang ïa ka jingpynshisha jong ki samla pule bad ki nongwan jngohkai pyrthei shwa ka snem pule ban wan biang, ki dei ban ai ïa ki “jingtip ba donkam” hapoh “72 kynta”.
Kane ka jingleh jong ka sorkar u Trump kan pynlong ïa ki samla pule kiba la don lypa ha katei ka skulbah, ba kin hap ban kynriah noh sha kiwei pat ki skulbah lane ban duh noh ïa ka jinglong aiñ jong ki.
Katkum ka jingkhein jong ki skulbah, ka Harvard ka la pynrung kyrteng haduh 6,800 ngut ki samla pule nabar ri ha u snem pule 2024-2025, kaba long 27% na ka jingpynrung khynnah pule jong ka baroh.
