Aizawl, Jymmang:
Ki pulit jong ka Mizoram ki la ïoh ban kurup ïa ki drok bapher bapher kiba shongdor palat 6.35 klur ha ki san tylli ki jingtohkit ba kyrpang ha ki hynriew sngi ba la dep hapdeng ka 17 tarik u Jymmang haduh ka 22 tarik u Jymmang, la ong ki pulit ha ka kyrwoh.
Ki pulit ki la ong ba ki la kem ïa ki 11 ngut ki briew, kiba kynthup ïa 2 ngut ki nongshong shnong jong ka Myanmar, halor ka jingdonkti jong ki ha ka kam khaïi briew ne ka jingkhaïi drok ha ka por ba la pynlong ïa ka jingleit khynra.
Ha ka jingshalan drok kaba heh tam ha kine ki 6 sngi ba la dep, ki heh jong ka kynhun CID (Special Branch) jong ka Mizoram bad ka tnat pulit ba kyrpang jong ka Mizoram ki la sdang ïa ka jingkhynra lang ha Seling ha ka Elaka Aizawl, kaba jngai kumba 36 km na ka nongbah jong ka jylla, bad ki la bat ïa kawei ka trok kaba dang ïaid ha ka 18 tarik u Jymmang, la pynbna ka khubor.
Ka la ïathuh ba, haba la khmih bniah ïa katei ka kali, ki pulit ki la ïoh ban kurup 39.15 kg ki dawai Methamphetamine kiba shongdor T.100 tyngka. 5.08 klur na ka jingdon jong arngut ki nong Myanmar. Ki pulit ki la lap ïa ki dawai Methamphetamine ba la ïoh kurup ba la buhrieh hapoh kawei ka jaka kaba don hapoh ka trok, la kdew ka kyrwoh.
Hadien kata, ka kynhun jong ki pulit ba kyrpang ba ïakhun pyrshah halor ki jingdih pynbuaid ki la pynlong ruh ïa ka jingkhynra ha Selesih hajan Aizawl, Mizoram, ha ka sngi Palei bad ki la ïoh ban kurup haduh 597 phial (80.49 kg) u drok Codeine na ka kti jong kawei ka kynthei nongdie drok, ong ka kyrwoh.
Ka jingtohkit kaba kham bniah katkum ka jingphla jong ka kynthei ba shah kynnoh ka la pynlong ban kurup sa 1,292 tylli ki phial (179.40 kg) jong u drok Codeine uba shongdor kumba T. 9.44 lak na kawei ka ïing buh mar ha ka thaiñ Ramthar veng jong ka Aizawl, la ong ka khubor.
Ka la ïathuh shuh shuh ba, ha ka 19 tarik u Jymmang, ki pulit kiba don ha ka jingkhmih bniah ha Tuisenphai ki la ïoh ban kurup 4.74 kg ki dawai Methamphetamine kiba shongdor T.100. 61.61 lak na kawei ka taxi.
“Ka kynhun ba kyrpang jong ki pulit Saitual ka la bat ïa tylli ki kali bad ki la ioh kurup 1.14 kg u drok Heroin kaba shongdor T.50 lak na kawei na ki kali ha sor Saitul ha ka 17 tarik Jymmang.Ki pulit ki la kem ïa ki nongñiah jong ki ar tylli ki kali ha katei ka jaka, katba ka jingtohkit kaba bniah ïa katei ka kam ka la pynlong ban kem ïa uwei u briew na ka jylla Assam.
Ha kawei pat ka jingkhynra, ki pulit ka Lunglei ki la ïoh ban kurup 193 gram u drok uba shongdor T. 5.79 lak na ka jingdon jong uwei u nongdie marbam hajan ka shnong Dawn ha Lunglei distrik ha ka 20 tarik u Jymmang. Ka bor pynïaid ka la pynngat ïa 11 ngut kiba shah kynnoh katkum ki kyndon ba ïadei jong ka Narcotic Drugs and Psychotropic Substances Act, la bynrap shuh shuh ka jingthoh.
